經濟好轉，係打工仔轉工跳槽嘅理想時機。亞視新聞部兩朵小花上月不約而同退出公仔箱，佢哋分別係《亞洲早晨》主播梁靜雯同記者廖家欣。
八方聽聞，兩位小花都算亞視一手湊大，由實習記者做起。廖家欣中途去過國泰做空姐，舊年重返亞視，𠵱家又再出去闖過，據聞會去金融機構做marketing；梁靜雯就會去做公關。兩小花現時分別去咗歐遊，等充電完畢，再到新工作環境搏殺。
查實亞記新聞部近排除咗台前，幕後一班攝影師同工程人員都明顯流失多咗，部份仲係俾友台挖走。作為新聞界嘅一分子，八方就希望隨住市道好咗，從業員嘅薪酬都有合理調整啦。