陳小春這個人快人快語，恩怨分明。對於疑似藝人淫照事件，他比較重女輕男，好像前緋聞女友張栢芝成為事件女主角，他謂若果自己是謝霆鋒，他會原諒妻子，但對於陳冠希，他就直斥太過不小心了。至於女友應采兒，小春就甜絲絲謂最喜歡她的笑容，也坦言是能㩒住他牛脾氣的人。 撰文：陳月媚
不忍心看淫照
疑似藝人淫照事件成為國際新聞，對娛樂圈來說影響深遠，陳小春作為圈中人，也感到蒙羞，日前他接受訪問時說：「呢件事唔單止對娛樂圈造成傷害，對香港人嚟講都唔係一件好光榮嘅事，呢個傷害唔知要幾長時間先可以彌補番，特別係牽涉入呢件事嘅幾位女藝人最慘，所以我一張淫照都冇睇過，因為成件事好醜怪，班女仔仲係自己認識嘅朋友，仲點睇得落，希望霆鋒唔好怪栢芝啦！」
未撫平喪母痛
如果換轉角色，小春又可以如此大量嗎？他不假思索地說：「假設我係霆鋒，我依然會原諒栢芝，但對陳冠希我就忍唔到，最衝動時，我真係唔知自己會唔會衝動到想教訓佢，因為佢太過唔小心，不過最後佢有返嚟香港道歉同承認責任，件事處理得型嘅，但唔代表我認為佢影呢啲相係冇問題，中國人思想始終比較傳統，實在唔應該咁樣玩法。」
陳小春一直侍母至孝，雖然媽咪已離世五年多，但他依然未能放下母親離去的傷痛。談起亡母的點滴，他眼泛淚光說：「我相信佢𠵱家喺極樂世界一定會好快樂，可能仲比我開心，但佢唔喺我身邊，我就冇佢咁快樂。阿媽唔喺度之後，個人好似冇咗精神支柱，連家庭觀念都少咗，佢喺我心目中嘅地位冇人可以取代，雖然過咗咁多年，要擺低呢份傷痛真係唔係咁容易，好彩我個妹嘅四歲大女動靜同媽咪好似，望到佢我就感受到一份溫暖，我都當咗細佬妹嘅仔女係自己嘅仔女看待，所以一有時間我就會見吓屋企人。」
以往小春的脾氣很火爆，但近年已稍為收斂，問他是否與母親離開有關？他說：「其實以前只係得我阿媽可以㩒得住我嘅牛脾氣，初期佢唔係度時，我啲脾氣仲發得勁，但人大咗脾氣慢慢識得收。」其實小春性情有轉變，與他有新戀情不無關係，自從去年他與應采兒墮入愛河後，心情較以前開朗得多。
愛上燦爛笑容
問小春喜歡應采兒甚麼時，男兒的柔情在面上泛起，不過他對感情事隻字不願說，在兜兜轉轉追問下，小春才半推半就笑道：「我鍾意佢嘅笑容囉！望到佢嘅笑容，你會覺得明天好有希望，佢嘅性格好可人，同佢一齊，的確令我開心嘅。𠵱家都係得佢可以收到我咋，不過感情事係好私人嘅事，我覺得冇必要同外界人分享，因為我試過有一個好唔愉快嘅經歷，就係當年我同人拍拖，我曾經同傳媒分享過呢個喜悅，結果換嚟報刊大字標題話我『癩蛤蟆想食天鵝肉』，你話滾唔滾？所以感情事我係想低調。」
在愛情路上尋尋覓覓，小春已到適婚年紀，可以看出他對應采兒這段感情相當認真，問他甚麼時候拉埋天窗？他說：「我當然想過成家立室嘅問題，但目前我覺得仲唔係時候，等我嘅事業再博多幾年先啦。」
創愛國時裝品牌
陳小春這幾年在內地密密做，收入不錯，投資物業也有斬獲，聽說兩年前他一口氣以2,000萬買入兩個凱旋門單位，今年放出大賺一筆，不過他澄清說：「講起呢兩個單位，我就肉痛，兩年幾前我睇好凱旋門會升值，所以買入一個高層同一個中層單位，但當時樓市冇乜起色，呢兩年我都供得幾辛苦，所以半年前見樓市有啲起色就急住放咗，結果一層係平手走，一層執咗少少咋（約200多萬），殊不知賣咗之後個樓市起得咁勁，白白唔見咗成千萬，你話肉唔肉痛。」
希望加入共產黨
除了投資物業，最近小春又與幾位好朋友合作在內地搞時裝生意，他希望將中國製造的時裝打入全世界，小春充滿憧憬的說：「我嘅服裝品牌叫『秦唐元滿』，英文名叫QTYM，個名係用中國四個朝代起，我希望以最優質嘅服裝打入世界市場，等全世界嘅人都知道中國可以製造出高質素產品。」
小春有一份愛國情懷，很希望中國能夠崛起，當自己走遍全世界時，能以中國人為榮。為了替國家出一分力，他可愛得甚至想過要入共產黨：「我首先聲明，我對政治毫無興趣，想入黨，純粹係想有發言權，然後想幫國家發展做啲嘢，所以幾年前有次上京喺釣魚台國賓館我曾經提過想加入共產黨，當時仲係國家副主席嘅曾慶紅走埋嚟同我握手時，曾經喺我耳邊問我：『你真的想加入黨？』當時我答佢：『是的！』佢聽到之後面帶笑意，講真當時我係有啲受寵若驚，佢竟然走嚟問我。」
愛唱歌多過演戲
已有3年時間沒出國語碟，本月中小春會推出新國語碟《我不是偉人》，在製作過程中他給予不少意見，小春說：「我要好感激環球畀咁大自由度我去做呢張碟，可以揀自己鍾意嘅歌嚟唱，其實唱歌同演戲畀我揀，我係鍾意唱歌多啲，因為自己唱嘅歌，歌迷受落嘅話，嗰種快感好難形容。因為我對隻碟要求好高，所以要揀啱歌先肯出碟，唔會隨波逐流。」
