小小超李澤楷永遠唔會令人失望，幾年前蛇吞象買起香港電訊令人大開眼界，近日上演真人版「英雄救美」，幫簽落極辣條款合約嘅梁洛施（Isabella）「贖身」，為Isabella爭取民主自由從事演藝工作權利，真金白銀貫徹「真民主」信念。
換嚟自由身十分值得
全城關注呢單世紀勞資糾紛，上流社會都議論紛紛，「上海灘」創辦人鄧永鏘（David）噚晚出席蘇富比喺會展舉行嘅酒會，大談小小超與Isabella關係。外傳英皇要求兩億元先肯放人，David認為呢個係最起碼金額，因為舊公司可能要求藝人有特別表現（specialperformance），如果可以花二億換嚟自由身，十分值得。佢又指二億對小小超而言濕濕碎，只係「江山一角」，就算老竇李超人唔鍾意都冇符，「佢大把錢，唔使靠老竇。」
雙方𠵱家劍拔弩張，David估計英皇會放人，「佢（Isabella）唔想做，要佢監硬嚟做，唔會做得好。」至於呢單官司邊方佔上風，David話好難講，「AlbertYeung（楊受成）同RichardLi（李澤楷）打官司，唔係一般官司。」41歲嘅小小超同19歲嘅Isabella年齡相差大，好多人唔睇好，David卻認為年齡唔係問題，「愛情唔應該俾年齡侵略。」至於女方日後會唔會得到幸福，飛上枝頭成為徐子淇第二，佢指Isabella今次好好彩碰上一個「金色王老五」，不過，「有錢唔一定幸福，但係機會高啲。」
潘楚穎嫌小小超老
盛傳撮合小小超同Isabella嘅楊紫瓊至今冇表態，佢契女、潘廸生女兒潘楚穎（DeeDee）噚日都有喺酒會現身，DeeDee話唔知道契媽做紅娘，都係睇報紙先知道呢單大新聞。DeeDee可能因為本身家底厚，所以唔羨慕Isabella泊埋「金色王老五」大碼頭，「如果我19歲，一定唔會揀個41歲男朋友，我今年25歲，最多搵個35歲嘅男朋友，但都已經好老。」
英皇老闆楊受成噚晚都有喺會展出現，同太太陸小曼出席「玩具大王」蔡志明公司旭日國際35周年慶祝晚宴，被問到上述官司問題，佢笑而不語，直行直過。
mailto:[email protected]