八方早前寫過，深水埗K20至K23重建項目有十幾戶街坊唔捨得離開，仲約發展局局長林鄭月娥落區同枱食飯訴心聲。街坊等足24晚，終於喺上個星期三（4月2日）等到林鄭登門拜訪。
林鄭斬燒鵝加餸
八方聽聞林太想低調，事前要求班街坊唔好通知記者。林太當晚收工後，特登去中環鏞記斬咗隻燒鵝加餸，街坊就炒咗碟菜，仲用埋喺深水埗出晒名嘅鹹蛋去蒸肉餅招呼局長。
枱上咁多餸，但席間街坊一路食，一路向林鄭訴苦，講吓佢哋點解咁唔捨得呢區，點解寧願唔要一個仙賠償，一定要留喺度。林太當晚只係聽意見，講明會喺短期內畀個答覆街坊，睇吓點解決件事。
不過，發展局局長個新聞秘書噚日向八方證實，林太當晚確實係落區同街坊食飯，主要係去聽吓意見，但呢區嘅重建計劃應該唔會有變。但街坊一日未等到發展局正式回覆，一日都未死心，佢哋噚日喺青山道搞咗個藝術行動，由美國嘅藝術家帶住30幾個街坊同義工，齊齊用膠紙將花花同圖畫貼喺重建區嘅建築物上，希望政府唔好圍板拆樓，拆散佢哋嘅社區網絡。