行行都有「職業病」，醫生也不例外，不同專業的醫生因為見得傷病多，日常生活都會特別謹慎留神，避免「瘀皮」能醫不自醫，像皮膚科醫生避曬太陽保皮膚白滑、骨科醫生不戴戒指免扯甩指、精神科醫生極力避免婚外情、婦科醫生說話忌粗鄙大聲、臨床微生物醫生不吃生蠔及刺身，全部有根有據，不是偶然。 記者：張嘉雯
不戴戒指防扯甩指
「我哋唔戴戒指，你見大部份surgeon（外科醫生）就算結咗婚都唔會戴，因為見得太多戒指撕裂損傷，成隻手指扯甩，唔敢戴。」高拔萃說，骨科醫生也鮮會讓子女溜冰，因為他們接觸過不少被溜冰刀𠝹傷手的個案，通常鄰近溜冰場的醫院，如東區醫院、瑪嘉烈醫院見的病例較多，輕則跌斷手腳或皮外傷，重則墮地後被輾斷手指，暑假、新年及聖誕等學校假期是高峯期。
由於骨科手術涉及螺絲、鋼線、人工關節等外來物，對衞生要求較高，平日工作時，骨科醫生雙手會各戴兩隻手套，替病人消毒完後就脫去外面那對，而且不會選用現時流行的超薄手套，「因為我哋好似工匠咁，會用鎚、鋸、鑽，又會摸到骨，手套太薄就會容易刺穿。
避曬太陽保生招牌
一張白滑的臉，是皮膚科醫生的生招牌，陳衍里一臉白皙除了是先天，也有後天努力，平日他不會曬太陽，如果無可避免接觸日光，會先塗防曬，比一般男士講究，「我唔會食煙，因為食煙啲皮膚會老得好快，平日會飲紅酒、飲綠茶，有抗氧化作用。」
近日社區性抗藥性金黃葡萄球菌爆得旺盛，平日至愛SPA及桑拿浴的他，惟有暫避鋒頭，「我好鍾意浸SPA同桑拿㗎，𠵱家唔敢呀，massage（按摩）都唔敢，或者一按完即刻冲shower（花灑浴），唔會浸commonbath（公眾池），喺屋企先敢浸，成日見到啲病人（染病後）個身一嚿嚿，起晒膿頭又潰爛咁，點敢呀！
怕婚外情無好收場
以為精神科醫生只是對藥物及酒精特別警覺，但原來對感情也會非常小心，「因為見得太多婚外情，通常都無乜好收場，淨係三角戀都夠死啦，啲病人嘅精神會相當大困擾，會盡量避免。」精神科醫生對女病人、女護士會特別「警惕」，「我同病人永遠都係醫生同病人關係，唔會做到朋友，如果有病人話要喺診所以外地方見面，我唔會應承，以前有啲行家就係咁出事。」
陳仲謀說，精神科病人把心底秘密向醫生吐露，容易出現情感轉移（transference），「並唔係話個醫生高大威猛靚仔過人，而係醫生要輔導病人，病人連同丈夫或者男朋友嘅性生活咁delicate（細密）嘅嘢都會講，醫生幫到佢，好容易令佢將情感搞錯。」他直言，醫生與病人發生感情非常危險，「醫委會可以釘牌㗎，我哋成日講笑，如果有個鍾意嘅女仔，就叫佢去睇第二個，然後自己去追囉。」
戒食生蠔驚菌入肚
醫學界中，最不理想的「飯腳」，極有可能是微生物及感染專科醫生，他們平日不吃刺身、不吃生蠔，蛋要全熟，雞肉不可以有鮮血，他們的眼睛猶如顯微鏡，每種食物有甚麼細菌病毒，他們都可以如數家珍。
何栢良笑言，同行偶然會笑他們甚麼都不吃，「早排同啲醫生去大陸玩，有個地方，用柴火煮螺，個個就拎住個碗等食，但係黑麻麻乜都睇唔到，都唔知食緊乜，我同佢哋講番早排國內啲凉拌福壽螺出事，啲螺被污染咗又無煮熟，老百姓食完上腹痛，之後仲腦膜炎，有成過千人中招，講完之後一個二個放低晒筷子。」
切忌粗魯易招投訴
靳嘉仁說，婦產科可能是最溫柔的專科，男醫生說話時斯斯文文，「就算係好大隻，平時好man嘅男醫生都唔會粗粗魯魯，因為會俾人投訴，講說話唔可以猥瑣粗鄙，要從女人角度出發，𠱁吓𠱁吓咁，以前喺醫院做嘢，啲新醫生講嘢大聲啲，啲senior（高級醫生）一定會出聲話，潛移默化自然溫柔細心啲。」
因為經常會接觸病人下體，婦產科醫生習慣經常戴手套，「婦產科醫生係慣咗手勢，一掂個病人就會戴手套，就算摸吓個肚都會戴，以前好古老嘅公立醫院資源缺乏，都起碼戴一隻手套，因為病人可能有啲好特別嘅感染，例如椰菜花呀、陰蚤呀咁。」
