梁洛施（Isabella）與英皇娛樂的合約官司勢在必行，主角Isabella現時在美國學習英語，據有份與她合演荷李活電影《盜墓迷城3》的黃秋生透露，原來Isabella早在拍攝該片時已計劃進修，又謂對英皇控告她一事感奇怪，覺得事件很有趣；至於仍身在英皇的鄭希怡（Yumiko），則謂不怕Isabella上庭講述在英皇多年來的遭遇時，會牽連其他同門藝人，並稱很想聽她有何發表。
梁洛施與所屬經理人公司英皇娛樂關係勢成水火，有傳Isabella欲以合約中有不公平條文而與英皇打解約官司，英皇也不示弱入稟控告Isabella違約，雙方將對簿公堂。女主角Isabella現身在美國由好友楊紫瓊照顧及惡補英語，為日後進軍荷李活鋪路，原來她早在拍攝電影《盜墓迷城3》（TheMummy:TomboftheDragonEmperor），經楊紫瓊介紹認識李澤楷時，已有讀書進修的打算。
「後生女讀多啲書好」
有份參演《盜》片的黃秋生昨日身在外地，他接受本報長途電話訪問時，透露拍攝期間與Isabella甚為投契，無所不談，當談到英皇已入稟控告Isabella違約，秋生說：「係呀？有啲咁嘅事？佢（梁洛施）有推job咩？」他又續說：「佢有同我講過公司叫佢去讀書，所以唔接工作住，我仲鼓勵佢話好吖，後生女讀多啲書好喎！𠵱家咁有趣呀？告佢呀？咁公司又話叫佢去讀書嘅？又話唔同佢接job住，咁又告毀約？不過人哋公司嘅事我冇權插嘴。」問秋生可相信Isabella與李澤楷拍拖？他說：「呢啲嘢我唔知喇，啲報道都搞唔少嘢出嚟，信唔信好難講。」
秋生多年前也是英皇電影部旗下藝人，有傳他當時簽下兩年合約，每年接拍三齣電影，不過他簽約後一年內只獲安排拍攝了1部電影，故他為此甚感不滿，並向英皇要求解約，對此秋生昨日說：「我最後冇解約，係等到約滿先走。」
另一方面，仍身在英皇的一班藝人，昨日也對「同門」Isabella將與公司打官司一事議論紛紛，鄭希怡、關智斌及鍾舒漫昨日在沙田出席「選民登記揭幕禮2008」活動時，身為Isabella師姐的Yumiko說：「我冇同Isabella聯絡，希望佢開心快樂，做邊行都有開心同唔開心，係佢自己嘅選擇，我都唔方便去評論。」有傳Isabella會出庭講述簽約英皇後的遭遇，問Yumiko可擔心或會被爆私隱時，她說：「唔擔心，都想聽吓佢點講。」
「有人講解合同內容」
英皇新人鍾舒漫則說：「我同公司簽合約時，有人講解份合約嘅內容，我都有畀屋企人睇過，覺得正常先至簽。」關智斌說：「成件事去咗法庭唔方便講太多，我係smallpotato，唔知發生乜嘢事，已經好耐冇同佢聯絡，唔係因為今次件事所以唔搵佢，因為冇搵過佢，都唔知佢電話有冇改到。」
此外，同屬英皇的洪卓立昨在九龍灣出席《張國榮─星．聲傳奇》紀念活動，被問到會否覺得與英皇簽長約受束縛時，他說：「冇話公唔公平，對我嚟講唔算長。」假如與公司鬧不快會否同樣要求解約？洪卓立說：「唔會去諗合作唔好，𠵱家我同公司合作好愉快。」他又謂會祝福Isabella。
採訪：陳寶明、魯萍、王崇穎
攝影：陳志嵐、黃文成
