睇陶傑寫中環寫得過癮，好似想寫中環人語咁。中環街頭，聽咗好多人談話，確實係陶傑所講一樣，大家講嘅係「香港話」，唔係「廣府話」。一流寫手陳惜姿唔做《壹週刊》，做咗媽咪之後，到中文大學做新聞寫作導師，最近喺佢嘅專欄講起當年大富豪（其實係榮智健）控告《壹週刊》誹謗一事，涉及一句廣東話俗語：「狼過華秀隻狗」，陳惜姿話在課室上講出嚟，學生以為佢講外星文，無人明白何謂「狼過華秀隻狗」係乜嘢意思，於是陳惜姿講到要拯救廣東話，向八十歲老婆婆學習，記低阿婆所言：「瓜老有餐餸，人老冇乜用。」
左丁山有幸經常與前輩銀行家如賓架Ｔ、賓架Ｌ等人食飯，偶然間俾佢哋講一句廣東俗語，即刻考起，可惜冇學似陳惜姿咁，用筆記起，之後就唔記得咗，睇怕以後都係要做吓筆記，自己唔用，交畀陳惜姿都好。
中環行人天橋由國金二期接駁至中滙大廈、娛樂行、直上蘭桂坊，十分方便，每日中午十二時半至一時，天橋上行人多到不得了，在人群中聽到嘅語言就係英語、普通話與香港話，中英夾雜，英語口音有美國、英國、澳洲，一聽而知係喺嗰邊留學返嚟嘅。
最近有好幾位年青朋友自紐約、芝加哥、雪梨、倫敦回港，人人都想喺香港搵工，唔願返去陪父母。當年父母移民嘅主要理由係「為了下一代」。眨眼間過咗十幾年，下一代大學畢業了，好多都話要回港工作，留低父母兩人在彼邦。呢日遇到一位二十九歲嘅會計師（CCPA），睇吓名片，嚇了一跳，已經係大銀行嘅VicePresidentRegionalHead，鎮日飛來飛去，佢對左丁山講：「留響雪梨做會計係容易搵工，但好悶嘅，稅率又高，好彩返咗嚟香港，搵工易，大把機會！」二十九歲就做部門地區主管，顯然係叻仔一名，佢話返到嚟反而碰到好多澳洲留學生，以前喺雪梨冇機會撞到。呢班人講乜語言呢？當然唔係廣府話，而係香港話：「Uncle，我好enjoy同你見面，下次我請食lunch，我會email畀你。」