陳坤耀退休嶺大校長後未有新動向，閒來無事，噚日帶咗幾隻珍藏名錶與同好分享收藏靚錶心得。據講陳坤耀有逾200隻藏品，香港人多數愛「金勞」，陳坤耀卻話雖然買勞力士保值，但佢卻嫌有啲俗。
百德菲臘最當炒
陳坤耀係經濟專家，佢教路如果想炒錶，PP百德菲臘最當炒，每年最少升值三成，好多人唔問價就買，矜貴型號隨時一轉手就升一倍。不過佢強調自己買錶唔係用嚟炒，係鍾意個設計同欣賞複雜嘅機械結構。
買錶要花錢，養錶都唔平，陳坤耀話一隻零件複雜嘅手錶，每五年就要寄返瑞士原廠抹油，費用要成兩萬蚊，廠方會成隻錶拆開，逐件零件浸油再重新組裝。唔少人認為瑞士錶最好，陳坤耀則鍾情德國錶，其中Lange兩師徒係佼佼者，佢認為徒弟青出於藍，製品係全世界最好嘅錶。
陳坤耀又指近年中國手錶都唔錯，海鷗牌就出好多靚機械錶，部份錶廠更向高難度挑戰，外國手錶最多有一、兩個陀飛輪，中國已經有手錶做到三個，而國內年輕富豪開始沉迷藏錶、炒錶，令整個市場更熱，有人指中國人消費已佔瑞士手錶市場兩、三成，真係唔講得笑。