好多朋友都成日講笑咁話自己患咗「早年癡呆症」，記憶力提早未老先衰，有無諗過無記性原來同精神健康出咗問題有關，更隨時係患上抑鬱症嘅先兆，特別係家長如果發現仔女記性大倒退就要留心，因為細路仔精神壓力大，可以影響睡眠，令到記性變差，要及早睇醫生搵出病因先係上策。
面對學業家庭壓力
最近聽個精神科醫生朋友講，唔好以為記性越嚟越差係老人病，大約有一成因記憶力下降求診嘅病人係後生仔，好多仲係準備緊公開考試嘅學生，近排就有一個19歲嘅重考生嚟睇醫生，佢幾個月之前開始因為精神緊張失眠，用盡方法包括食安眠藥、進補、做運動、按摩都無用，睇醫生前一星期記憶力突然間大倒退，夜晚溫完嘅書，第二朝起身大部份都已經唔記得，喺父母強迫下睇醫生，先發現原來係抑鬱症作怪。
處身喺沉重嘅考試、工作同家庭壓力之下，好多人都會問點先可以保持精神健康，其實身體有一種物質叫做血清素，可以用嚟鎮定情緒，解除焦慮，日常有好多食物都可促進血清素分泌，幫人帶嚟快樂情緒，好似深海魚、香蕉、全麥麵包、菠菜、南瓜同雞肉都不妨多食，能增強身體抵抗負面情緒嘅能力。
blog主：醫神