左派獲北京大水喉支持，喺選舉時大規模進行票站調查，方便自己人調兵遣將拉票，選管會聲言加強規管，不過建議嘅措施隔靴搔癢，八方相信選舉不公平情況唔會消失。
民調專家港大民意研究計劃主任鍾庭耀，噚日喺港台節目《香港家書》中直指，香港候選人靠走法律罅而進行大規模票站調查世間罕見，因為外國有專業操守管制民意調查，毋須鬼鬼祟祟咁做票站調查，之後偷雞用嚟配票、動員。
鍾庭耀話，贊成人人都可以做票站調查，如果有人將票站調查資料，喺選舉日作為配票策略同人手調配，有關開支就應該計算喺選舉經費之內，否則所謂「禁止拉票區」形同虛設，政府即係自打嘴巴。