黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。Textby黃偉文
幾個星期前我在ChanelMobileArt的party兜口兜面「教訓」了某位名女人一頓。
KarlLagerfeld要離場了，大家慌忙跑過去爭取合照的最後機會，留下一個無人看管且顏色鮮艷的2.55手袋在人來人往的party梳化上，幸好「名師合照」於我可有可無，於是便自動留下替苦主睇住個手袋，並且從袋的顏色猜到了幾位疑似事主裏，到底誰是大頭蝦。
她影完相施施然回來時，我指指梳化上那遺孤，問她：「這個手袋是不是你的？」
她說是呀，而且神情開始緊張，我以為她終於明白事態的嚴重性，料不到她接下來說的卻是：「對唔住呀，我今日趕時間摷唔到袋，所以攞咗個幾季前嘅款出嚟用……」原來她以為我勢利到check她的手袋到底是不是offseason的（雖然換了我是她，我估我個第一反應都是一樣的）。
我其實打算講的是：「你知唔知你咁樣留低個手袋喺度冇人理好危險？好彩我一路幫你『睄』住，否則手袋裏面個電話俾人攞咗，下一個淫照案主角好可能就係你？」
「係喎。」佢話。
我都諗咗好耐到底應唔應該開名，因為我與當事人本身唔係好熟，開了出來的話，我怕她誤會我笑佢，其實我只想因為這個案提醒天下女士去蒲時請格外小心財物；但如果不開名的話，我覺得聽起來更似醜聞，令事主更水洗唔清，所以……對不起，薛小姐，我相信你有足夠的胸襟與幽默感，不會怪我吧。
另一個Party，另一個手袋的故事
其實要搵個人替你保管手袋，都唔易。
我常常在商場洗手間門口看到這種場面，男人企喺度替女朋友挽住手袋，等她們辦完事出來。我常感到奇怪，如果明知拎住那個手袋去廁所會不便的話，為甚麼還要拿出街用呀？可見帶埋入去其實是得的，只不過是想詐吓嬌而不理儀態（我是指男朋友的儀態）而已。為甚麼會有女人會唔介意自己條仔唔型嘅呢？男人老狗拎住個螢光粉紅加金鏈的StamBag喎？
有甚者，不只是廁所門口，是大街大巷，我都很想知一個男人要愛個女朋友愛到甚麼地步才肯公然孭着她的手袋縱橫中環銅鑼灣呢？就算願意為她赴湯蹈火也可以愛得冇咁肉酸啩？明知你今日約咗佢又怕女朋友手袋太重孭親阿心肝椗，不如一早自備visvim背囊，質咗佢入去先孭都得啫？
我的疑問終於得到解答。在PradaElement新店的開幕酒會上，我看見某女賓客將手上的今季新款水彩色patchwork袋交給老友拎住才去lady'sroom的，這一雙由於雙方都面帶寃氣的笑容，看起來不覺突兀，只見恩愛，但我仍忍不住走埋去問問那位老公「點解你替老婆拎手袋拎得咁自然」？
他對我說：「咁你一定係未結婚而且未有小朋友㗎嘞！你知唔知我平時拎啲奶樽袋尿片袋玩具袋全部都有火車頭Thomas或者恐龍Bernie喺上面㗎？所以，我已經對拎任何的袋都免疫㗎啦！今日咪算elegant囉，起碼係Prada袋一個！」
哦，原來不是「愛你愛到挽手袋」，原來是「幸福到值得為你變乸型」，我甚至開始有妒忌㖭。
又另一個牌子，另一個手袋的故事
應承了參與Fendi10+的手繪手袋慈善拍賣，因此事前做了個配合宣傳的訪問。
記者問：「你認為手袋對女性為甚麼那樣重要？」這我之前也沒有想過，但一想就不難有我的推論：「我估因為女人談戀愛時是全情投入全心奉獻的，但仍想保留小小的秘密，因為這些小秘密令她們有信心，而手袋這種『仲有少少你睇唔穿我』的感覺，令女人自覺很有魅力。」
品牌當家M小姐聽了卻覺得很詫異，因為SilviaFendi小姐下一季的創作意念竟然和我這不用手袋的人看法不謀而合，相當接近，款式靈感來自「夾萬」，而我其實是隨口噏㗎咋。
記者打蛇隨棍上問道：「如果女人的終極秘密收埋喺手袋，咁男人嘅終極秘密又收埋喺邊呢？」
這個我半秒都唔使諗反問番佢：「你係咪香港人嚟㗎？今年農曆新年經歷咗咁多新聞，仲使問男人嘅秘密收埋喺邊？」
她哈哈哈。
我補充：「雖然機身不一定是粉紅色的！」
另一則關於買袋的重要消息：我自己都有幾個朋友看了我的西班牙遊記，專登去巴塞隆拿買Birkin，結果都空手而回，我用一生購物運發誓，當日的確是有四五個寶金袋擺喺度冇人買的，想不到兩個月後形勢已有變，勸大家不要再專程去找這個袋了，免得好似跣了大家，令各位失望，對不起！
本周Styling
想男人樂意替你拎手袋的終極手段是：由今日開始煲，煲到連男人都興拎手袋出街咁得囉。
老實講，全套tuxedo加blingblingclutchbag這個idea我認為在styling上是可以work的，都想試咗幾年了，我唔介意你爬我頭㗎！
