自從出嚟工作後，敏妮斷斷續續都有報讀財務或者金融相關嘅課程，除咗係為考取某啲專業資格，亦係為咗工作上需要。前幾日，敏妮返工時碰到一個舊同事，佢見到敏妮就問：「近排仲有冇讀啲乜嘢課程？」講起呢位舊同事，敏妮好佩服佢，因為早年市道好時，佢一個人做幾份工，除咗正職，仲有數唔盡嘅freelance，搏命搵錢令到佢好快就儲到第一桶金，兼有一層樓。
無謂嘥錢嘥時間
舊同事無喇喇問敏妮讀啲乜課程，原來佢想喺公餘時間進修，「敏妮，我都想讀吓財務管理，呢瓣𠵱家好渴市，再講吖，我年紀都唔細，仲可以好似後生時咁，一日做幾份freelance咩，讀完財務管理，就算轉唔到行，都可以管理吓自己嘅財務，學吓投資。」
敏妮一向都好鼓勵朋友公餘時間進修，不過敏妮不諱言自己係個市儈精，學插花、焗蛋糕，甚至瑜伽等，除非認真到考個專業資格返嚟，否則無謂嘥錢嘥時間。
將學習融入生活
不過，讀財務管理或者金融相關嘅課程就例外，就算真係考唔到乜嘢專業資格，但正好似敏妮呢位舊同事講，讀完之後轉唔到行，起碼都可以管理吓自己嘅財務。
敏妮身邊都有朋友，因為見到敏妮讀書讀得開心又輕鬆，所以一齊去讀，但就發覺「啲課程好深、好難」，甚至想放棄。其實，大家都係讀同一個課程，敏妮讀書唔係特別叻，天資唔係特別聰穎，亦唔算特別勤力，讀得輕鬆係因為敏妮將學習融入生活，尤其敏妮一直報讀嘅課程都係同「錢」有關，睇得呢個欄都知敏妮嗜好係搵錢，敏妮就試過同光頭仔一齊利用財務算式，拆解市面上一啲投資產品嘅真實面目。仲嘗試設計一啲模擬產品，𠱁身邊朋友落叠，當然只係開吓玩笑。
香港地打份工其實已經好辛苦，公餘仲要去進修當然要講求效益，其實公餘進修唔應該畀自己有壓力，能夠將學習到嘅喺生活中用番出嚟，其實同考到專業資格一樣實用。
http://wanmanli.com/blogs/