超級星期天點可以冇我求驗客?同平時唔同,逢禮拜日我會少啲批判,同大家分享多啲得意新聞,等大家睇得過癮。
「踢出彩虹」呢句說話已經out啦!??家鼓勵後生仔踢波要講「踢出美金」,好似美職聯洛杉磯銀河隊球星碧咸咁,今季收入就高達650萬美元(約5,063萬港元),真係傳腳波都隨時有美金飛出嚟咁滯!
根據美職聯球員工會公佈,碧咸08年球季周薪增加12%至129,395美元,但喺07年佢都係「冧巴溫」,波糧就係650萬美元(550萬為基本人工),係第2位賺266萬嘅芝加哥火燄前鋒白蘭高嘅兩倍幾(見附表),隊友美國頭號球星當路雲年收入都係得90萬美元,唔知美國佬會唔會眼紅,故意踢傷碧咸呢?
我求大俠就覺得唔會啦!因為今年333名球員嘅年薪收入中位數係61,273美金,比去年增加16%,多得碧咸帶挈啫!其中46名球員收入達到聯盟33,000嘅最低收入。至於青年軍方面,30人賺17,700美金,43人賺12,900美金。
用心踢波冇人能及
講到用心踢波,冇人及得上碧咸。呢位32歲老將早前攞咗100頂國家隊喼帽之後,喺上周四2:0勝聖荷西地震場美職聯,射入美職聯首個入球加有一個助攻。法國雜誌《法國足球》都以「碧咸仲在生」報道,雖然嗒落有諷刺意味,不過亦證明外界對碧咸嘅關注。佢賽後亦講:「上季我比賽狀態得5成」,睇嚟「萬人迷」好戲將陸續上演。
所以,我求大俠幾時都話,人哋賺到豬籠入水梗有理由嘅!你睇碧咸每次比賽,老婆、囝囝、外母都在場打氣,呢啲咪叫家和萬事興囉!好多球星一出名就囂爆,一有錢就爛玩,點及碧咸默默耕耘。
今季美職聯球星收入前6排名
碧咸(洛杉磯銀河):650萬
白蘭高(芝加哥火燄):266萬
馬些路加拿度(華盛頓聯隊):187萬
安祖(紐約紅牛):159萬
雷拿(紐約紅牛):127萬
當路雲(洛杉磯銀河):90萬
註:1美元兌7.79港元
話你知:收入壓倒拜恩奧尼爾
碧咸去年登陸美職聯後,雖不至於馬上在美國掀起足球旋風,但好歹為足球運動吐氣揚眉。因為《福布斯》公佈07年運動員收入榜,碧咸就躋身第6,壓倒NBA球星拜恩和奧尼爾。
去年碧咸總收入達3,300萬美金(約2.6億港元),僅次於已退休的F1世界冠軍舒密加,以及現役F1車手拉高倫、高爾夫球手活士(首位)等體育明星。然而,美國4大運動(美式足球、棒球、冰曲、籃球)的選手都排在碧咸之後。
NBA球星拜恩以3,290萬美金排第7、奧尼爾以3,190萬美金排第8、「籃球之神」米高佐敦得第9(3,100萬美金)。相信碧咸的存在將進一步改善美職聯的財力和人氣,使更多美國人參與足球運動。文:法比奧