如果要數世界知名嘅越野車賽，除咗「WRC世界越野錦標賽」外，當然唔少得巴黎至達喀爾嘅越野賽。不過，我諗喺6月下旬舉行嘅「朝柴盃越野拉力賽」，日後都有望成為世界知名嘅越野車賽。全名為「朝柴盃2008年〔中-蒙-俄〕國際汽車越野拉力賽」嘅賽事，將會喺6月下旬舉行，一眾參賽車輛將會喺遼寧嘅朝陽出發，途經內蒙古東烏珠穆沁旗、蒙古國西烏爾特、溫都爾汗及烏蘭巴托同俄羅斯貝加爾湖，最後以俄羅斯嘅伊爾庫斯科作終點。
喺全長5,120公里嘅路程入面，當中1,800公里為比賽路段，穿越路段則為3,320公里，屆時會有10個國家同地區共60位車手參加。日前，有關方面更喺香港舉行咗推介簽約會，希望藉今次比賽推動遼寧省旅遊業，亦可以將中國嘅賽車事業推至另一高峯。
記者：鄭達基