特首辦噚日刊登招聘廣告，幫煲呔官邸禮賓府請一名三級家務員，即係廚師。唔知係咪又係為周融度身訂做，呢個職位唔使大學畢業，但要有最少六年喺大戶人家做中廚經驗，能操流利粵語同簡單英語，要超時工作同住宿舍。
做煲呔「御廚」條件仲包括精通中菜烹飪，有煮東南亞菜及西菜知識，日常主要工作係為煲呔一家煮飯，喺官邸、粉嶺別墅為賓客提供餐飲服務，又要協助曾太設計餐單、買餸同準備食材，食物處理、清潔、保養煮食用具等都係份內事。廣告冇列明廚師要負責廚房保安，即係煲呔入嚟偷食，可以當睇唔到。呢個公務員職位，月薪由15,920元至16,910元，略高於市價，私人公司請5年經驗廚師，月薪大概12,000蚊啫。