米貴、蛋貴、肉又貴，搞到市民冇啖好食，有意喺九龍東出戰下屆立法會選舉，爭取連任嘅民建聯議員陳鑑林，一於藉民怨踩低超市抬高自己。佢較早前已經做咗個調查，踢爆超市貨品原來貴過士多，最近百佳大賣廣告話自己貨品最抵，聲稱花30蚊就可以買餐餸，又俾陳鑑林捉到字蝨。
幾個民建聯區議員訪問咗幾個黃大仙區主婦，了解佢哋要花幾多錢買餸，結果發現2人或以上家庭，根本冇可能用30蚊買到一餐餸，實際上至少都要50蚊至60蚊至夠。如果勉強每餐只使30蚊，惟有餐餐青菜加蒸蛋，每人只得兩、三塊肉，食唔飽兼可能營養不足。30蚊買餐餸，喺通脹時勢下只係一個笑話。