政府噚日舉行今年選民登記活動揭幕儀式，由政務司司長唐英年主禮，有關方面邀請60個立法會議員出席，卻只有3個自由黨議員畀面到場，佢哋同唐唐係自己友，唔撐場講唔過去。
香港政府搞公民活動鍾意搵明星做代言人，噚日現身明星以偶像派居多，唔少人都喺淫照風暴期間頻頻見報，好似農夫、鄧麗欣、方力申、鄭希怡等等，英皇歌手繼續獲政府重用，形象一向正面嘅石修同蘇玉華都有份。八方希望當局請所有嘉賓前都做過「品格審查」，否則日後出事就尷尬。
今年選民登記活動為期6星期，至5月16日止，現時全港約有460萬名市民符合選民資格，其中330萬人已登記成為選民，尚有130萬名市民未登記，想喺9月立法會選舉中投票，就要把握時間。