黃長興×黃長發×AudiTTCoupe　港男興發Guide

訪問十個明星，九個半都話DreamCar係法拉利、AstonMartin，港男兄弟黃長興、黃長發終於例外。細個幫爸爸手送貨時坐Hiace，一家人出外遊山玩水就梗係坐AudiA100，兩條𡃁仔標籤咗坐Audi即係代表有街去，當佢Friend一樣！難怪到今日都仲要搵番舊相好嚟影相，仲花足兩粒鐘Guide我揸Audi同坐Audi嘅好處。

記者：徐影龍
攝影：譚盈傑

細細個當Audi係老友

大哥黃長興（Stephen）四歲跟屋企人移居法國，已跟四個轆結下不解緣：「爸爸做製衣業，經常要揸車送貨，但唔熟路又唔多識講法文，所以就由我做嚮導，直至細佬出咗世，兩兄弟仍會跟車趁熱鬧，企喺Hiace後面扶住啲衫架，搖足成個鐘先到，都幾好玩㗎！
「但令我真正放鬆心情去玩嘅，就係坐屋企架AudiA100（即A6前身），事關我哋一家人周末出外遊車河都係坐佢，我同細佬每次坐喺後邊都好興奮咁四圍望，玩到攰就攬埋一嚿瞓覺，嗰張凳真係好舒服！
「而且當年巴黎嘅車普遍仲係用手絞窗，我哋架A100就已經係電動窗，感覺Audi好叻好勁，同學仔試過都猛讚，所以我細細個已經當佢Friend一樣，到今日睇番呢架AudiTT，偏圓外形帶點典雅、霸氣，依然好有親切感。」
Stephen外表斯文，不過入選得港男點都有啲剛陽味。「我就係鍾意Audi外表斯文但一樣咁Powerful，你睇吓架TT，個樣有霸氣得嚟仍然好高尚，唔似一般跑車咁凶神惡煞，嗰種Power較為內斂，啱我！不過真正DreamCar係AudiS5，TT後排太逼喇，我鍾意載多啲朋友周圍去，傾吓生活瑣事，咁先有駕駛樂趣嘛，尤其車係男人第二老婆，費盡心思執靚佢，都想同多啲人Share㗎。」

自動波唔好玩

「揸咗十幾年車都唔想轉自動波，始終想享受極速快感同操控感，只有棍波先畀到你。法國唔興自動波，個個都係揸棍波，至於吊極力子辛唔辛苦，只係睇你慣唔慣啫。不過法國人揸車的確禮讓啲，唔似香港咁爭先恐後，好多司機嘅駕駛態度都有問題。好似長Keep快線、小巴亂Cut線、的士經常急停、巴士又唔扭埋站先落客等。最離譜試過揸電單車時，俾架波子由西隧『啄』到過旺角。大家速度都好高，我架SuzukiGSX-R600都唔弱㗎，當時又唔甘心讓佢，諗番起其實幾危險，𠵱家我習慣Keep中線慢慢行，你鍾意咪爬頭囉。做咗藝人之後多咗人識，喺馬路上經常有人認到我，停燈位時有人會同我SayHi，又試過巴士上有班學生仔圍埋望住我架車，其實都幾開心。」

1.黃長興對電眼出晒名，拍埋AudiTT頭燈都毫不輸蝕，望落仲有啲似苗僑偉。「係呀，我套新劇就係扮年輕版嘅三哥。」

2.好欣賞Audi車系嘅外形同線條，粗中帶幼、凹凸有致，就如美女曲線，值得一再細味。

3.體貼細心，符合黃長興斯文外表，唔知會唔會幫人拉埋安全帶呢？

兩個轆戰神

黃長興話唔怕吹亂髮型時，會選擇揸心愛嘅兩個轆SuzukiGSX-R600出街兜風，呢架東洋戰神成600c.c.，電單車嚟講絕唔少嘢，06款賣價仍接近九千美金，仲勁過劉華架天若有情。

唔轟機多望側鏡

05年阿哥喺港男攞唔到冠軍，06年細佬出馬，大熱贏到落尾，可能黃長發（Francois）勝在外表更Man更剛陽：「其實我反而比哥哥更斯文，起碼我唔鍾意揸棍波車，亦唔想同人爭線，更唔享受揸快車，慢條斯理最緊要安全，就算有緊急電話我都唔會分神去聽。」咁乖？「其實我上兩個星期先喺駕駛學院Pass路試，個牌啱啱滿一星期，阿哥仲送咗架車畀我做禮物。
「講開考牌，香港排期真係快好多，兩三個月就搞掂，唔似法國咁起碼要半年，仲會考埋你對引擎、機械等認識程度，難度高好多！」新牌仔有無蝦碌事件？「有一次算幾驚險，喺高速公路轉線，望過倒後鏡見無車就Cut線，點知快線原來有架七人車不斷咇我，衰在我扭大音響聽歌，完全唔知佢喺後面，佢急停後我先醒覺，嚇餐死！從此以後我都唔會掛住轟機，同埋會Keep住密密咁望側鏡喇。」

見親TT唔願走

新牌仔梗會經歷俾人喪咇嘅階段，最緊要吸取教訓有進步，夠唔夠膽揸今日呢架成200匹嘅AudiTT？「其實我嘅DreamCar正正係AudiTT，我每次返公司見到Amigo（崔建邦）架黃色AudiTT時，都會企定定望一輪先肯走，次次都感覺到自己雙眼發光心跳加速，雖然鍾意頭尾對稱嘅舊款TT多啲，不過今日都想試吓新版，慢慢揸應該無問題嘅。」帶黃長發喺工業區兜咗一個圈，發覺佢真係慢慢揸，行一條直路足夠轉兩次燈，但滋油淡定表現又比好多新牌仔優勝，始終架TT成二百匹，我揸過都覺得易快難慢，長期輕踏油門好辛苦，兇狠粗豪只係黃長發嘅外表，同佢大佬完全兩回事。