奧運聖火仲有唔夠一個月就抵達香港，北京同煲呔政府擔心有人搞破壞，保護聖火任務令高官寢食不安，點知負責傳遞聖火嘅火炬手籠裏雞作反，仲令有關方面頭痕，隨時聖火未抵埗就出事。香港有120個火炬手，第一棒同最後一棒，據聞已內定由煲呔同霍震霆負責，至於其他118個位，江湖傳聞多位政經紅人已開始熱身，包括新任人大常委范太同行會召集人梁振英，另外多位為港爭光健兒亦係首選，獲奧運贊助商力薦嘅歌手明星，當然有機會曝光。
富豪第二代搶住跑
傳遞聖火隨時係一生人一次嘅殊榮，八方聽聞好多華資大孖沙爭崩頭想接棒跑一程，恒基四叔兩個仔家傑、家誠有氣有力，「恨」做火炬手好正常，不過另一個李家都有兩個仔喎，超人之子冇理由唔跑得啩。論對國家貢獻，兩位李生應該不相伯仲，計捐獻金額，兩家人都唔輸蝕畀對方，弊在火炬手名額有限，畀得個位「李」，又未必畀到「李」，有關方面十分傷腦筋。
喺香港財雄勢大家族唔只姓李，新地郭氏都富可敵國，佢哋有三兄弟，冇理由一個位都冇啩；其他大地產商都唔可以當冇到，要分到面面俱圓真係唔容易，複雜程度難過人大、政協分餅仔，絕對考驗領導人政治智慧同統戰手腕。若唔想麻煩，八方建議棟個紙牌公仔喺金紫荊廣場，想傳聖火嘅就排隊影相，唔使爭餐死咁勞氣。
沙田區議會㷫烚烚
八方聽聞民政事務局就因分餅唔勻被鬧，沙田區議會去年中互選三個議員做候選火炬手，據講當局𠵱家欽點恒生商學書院院長崔康常接火棒，互選時得票最高嘅民選議員羅光強落選，即時㷫到話要寫投訴信要求當局解釋。另一落選者鄧永昌指，政府搵18區代表傳聖火，理應搵民選議員先夠代表性，崔院長上屆只係委任議員，今屆連議員都冇做，何來代表性？鄧永昌話支持羅光強投訴，當局要畀個說法。
崔康常話當局未宣佈佢係火炬手，但強調自己精於運動，夠資格做火炬手，至於代表性則見仁見智，「奧組委揀人有準則，唔係由區議會決定。」羅光強屬沙田地膽政團公民力量，無緣傳聖火，公記喺北京眼中份量可見一斑。
mailto:[email protected]