黃大仙祠計劃大變身，連攝太歲都做埋，十分照顧迷信嘅香港人同自由行，民政事務局局長曾德成前日落區去黃大仙祠巡視，同行仲有東華三院主席馬清鏗。德成局長同馬主席去黃大仙，唔係拜神，背後原來涉及黃大仙同東華錢銀問題。
善款箱影響香油錢
嗇色園元老同八方講，好多年前祠外解籤檔同香燭檔亂擺，招來黑社會收陀地，由於當年黃大仙無力整頓，就交由東華興建新哲理中心安置解籤、香燭檔，東華負責管理、收租，黃大仙香火鼎盛，東華租金收入亦頗可觀。
為感謝東華幫忙，嗇色園喺黃大仙祠入口擺善款箱，請善信捐零錢畀東華做善事，近年多咗好多內地豪客拜黃大仙，佢哋捐錢闊綽，紅衫魚、金牛絕不罕見，由於好多善信誤以為捐錢就係添香油，影響到黃大仙收入，嗇色園方面越嚟越關注呢個情況。
黃大仙擴建後預計會有更多善信，正所謂肥水不流別人田，加上嗇色園唔鼓勵善信帶太多香燭入廟，想加強管理香燭、解籤檔，而為配合日後可能收入場費，繼續擺東華善款箱可能唔係幾方便，所以就搵埋德成局長同東華方面傾傾，據講德成局長當日冇乜具體表示。嗇色園主席李耀輝承認好多問題要同東華解決：「呢啲都係幾十年歷史問題，唔差在一年半載，可以慢慢傾。」