蘋果批Online
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵：mailto:[email protected]
網誌：http://pieatapple.wordpress.com
阿Sir做嘢唔鍾意俾人阻住，但現代法治往往就係要令佢哋做嘢唔好太方便，以防執法人員權力過大。所以，警方最近提出毋須「合理懷疑」都可以叫司機「吹波仔」（酒精測試），我哋絕對有理由懷疑可能導致警察濫權嘅嚴重後果……
主持：楊卓華 高明輝
1
高：警方提出有關建議時，並冇列出具體數據支持點解唔再需要「合理懷疑」，只係話「考慮到公眾對酒後駕駛的廣泛關注」。
楊：我哋睇番數據，其實近年經濟好咗，路面汽車亦多咗，但酒後駕駛交通意外就並冇明顯惡化。
2
Paul：警權係一個市民授權之下警方可以行使嘅暴力，我哋將呢種合法暴力畀警方去維持治安，係因為要佢哋對付嘅亦係暴力，但係呢種（警方的）暴力唔可以無條件，係要有限制、係唔方便嘅，如果唔需要合理懷疑都可以使用，咁唔係濫權係乜？
3
楊：刪去「合理懷疑」，警權似乎必然會膨脹，因為𠵱家就算有個差人成晚都冇叫過人吹波，佢都可以同上司解釋搵唔到「合理懷疑」；但係如果冇咗「合理懷疑」，差人就有可能有一個吹波嘅quota（配額），每晚要做夠先可以收工！
高：如果真係有一個「吹波quota」的話，將會十分擾民，市民亦會「合理懷疑」到時警察可能只會專揀一啲easytarget（容易對象）去填quota交差。
涂：呢個擔心都合理。同埋要監察呢種情況有冇發生，亦唔係咁輕易。
Paul：如果睇過之前鍾亦天、拾肆K等事件嘅檢控，點解我哋要畀一個方便警方呢？好似鍾亦天事件咁，警方檢控佢嘅時候未有百分百嘅證據，結果最後律政司撤銷控罪，無條件當庭釋放。可能就係咁，令到警方想攞大啲個權力，去方便自己嘅執法。
楊：據警方自己講，市民冇理由懷疑佢哋會濫用「隨機測試」嘅權力。佢哋似乎忘記咗，呢個絕對係一個合理懷疑，因為根據傳統智慧，任何權力都有可能被濫用。
