《高達00》覺醒反敗為勝

《高達00》覺醒反敗為勝

雖然《高達00》呢套全新動畫尚未在香港播放,但好多高達迷都已透過唔同渠道率先睇咗被譽為仲好過《Seed》嘅佢。亦因為咁,貴為《高達00》首隻遊戲嘅NDS版受到唔少人留意,雖然畫面質素一般,但玩落唔算差,仲講究戰術運用㖭,隨時正過唔少齋賣靚聲靚畫嘅大作。

撰文:陳福榮

機動戰士最新章

過往出色嘅高達動作遊戲,如果唔計加加埋埋出咗七集、喺街機依然大Hit嘅《Vs》系列,多數正嘢都集中喺PS2同PSP,例如之前PSP嘅《GundamBattleRoyale》就令好多人廢寢忘餐喺地鐵怒煲。相反NDS就冇乜突出例子,始終機能所限想搞靚啲3D都唔得,齋玩平面又似乎好Out。好彩《00》終於克服畫面同技術難關,雖欠缺好靚嘅立體機械人同場景,起碼玩法真係花過心思,唔係求其亂玩都打得爆嗰種膚淺Game。

■除咗主角同佢部專用GundamExia之外,玩家仲可以選用其他角色嚟開片。

系統集天下大成

本作品糅合咗冒險對話、任務揀選同戰場直擊幾個部份,首先喺開戰之前有啲似《櫻花大戰》咁要搵啲同伴傾偈,了解吓到時嘅實際情況,咁就唔使盲舂舂失敗而回啦。而且每部機械人喺戰鬥過後,只會補番若干能量,即係話如何有效地將小隊裏面嗰四部機互相交替咁出,就成為能否順利打爆機嘅關鍵。實戰玩法方面,有啲似《Vs》系列嘅表達形式,但電腦容許玩家作一定程度嘅自動瞄準,所以基本上弱雞目標都冇乜難度。惟獨對方若然又係高達嘅話,就無可避免要埋身狂劈咯。

■驟眼睇,畫面配置有七分似《Vs》系列,不過當然粗糙好多兼無得「震機」啦。

先中招再扭轉形勢

成隻Game最值得提及嘅,就係戰術支援同覺醒攻擊呢兩個「分唇」。所謂支援,就係進入任務之前選擇合適嘅幫手,例如有人可以即刻幫部機補滿油,有啲係減輕被擊中時嘅傷害,甚至亦有落埋場幫你一齊打等,但大前提係呢啲幫手一定要同你個機師「啱嘴形」先會有用,情況類似《拳王》嘅援護攻擊。
另一方面,《Seed》嗰陣就有「爆Seed」嚟瞬間強化機體能力,如今《00》亦有類似嘅覺醒攻擊,只要儲滿能量就可以發動絕大嘅特殊攻擊,隨時一下搞掂大佬級強敵。不過發動覺醒並唔係免費午餐,原因係玩家須要承受損傷先可以增加到Tension,亦即係話越接近死亡就越能夠覺醒,所以表面咁勁揪但其實一打唔中,咁就幾乎等同ByeBye了。

■遠程玩燒槍,咁埋身就梗係怒劈㗎啦!

■除咗地面戰同空中戰,仲要衝出外太空執行任務。

■好似格鬥遊戲咁,俾人打得多可增加Tension。

■變成飛機向前衝,玩落又幾似《超時空要塞》。

■大頭Cut-in已成為所有高達遊戲嘅必備內容。

■連砌模型都教埋,NDS超越打機變身電子手帳。

隱藏要素零舍多

如果話畀大家知呢隻Game一部隱藏機都冇,肯定冇人會信啦,事關無論《Vs》系列抑或普通動作玩法之類,高達遊戲好少只得最基本嗰批機畀人揀,今次《00》亦唔會例外。暫時已知第二小隊嗰三部新機,即係ThroneEins、ThroneZwei同ThroneDrei(德文嘅一二三號咁解),使用固有機體打爆晒任務模式就可以相繼使用,另外仲有兩部幾屈機嘅Nadleeh與ExiaRolloutColor,則要符合特定條件先得,比較棘手。另外隻Game亦收錄咗平時難得一見嘅砌模型功能「GunplaNavi」,頂癮處在於可跟住圖片StepByStep嚟做,始終係由專業雜誌《HobbyJapan》負責講解,肯定唔會搵人老襯啦!

■首批出貨仲有盒幾精美嘅模型隨Game附送,啱晒收藏家珍藏。(查詢:23661001)

機種:NDS
廠商:NamcoBandai
類型:ACT
人數:1人
日期:已推出
售價:$288