〈早飛王〉5連敗，點算？歡迎繼續追我對家，但我知都有讀者追我反底，無論如何，畢傑唔會退縮擔任此欄嘅主人翁。睇完今輪秩序，發覺本周英超波幾惡貼，其中最有信心嘅係周六護級大戰，要富咸砌低「黑貓」新特蘭。畢傑
富咸𠵱家排喺聯賽榜19位，距離護級安全線尾4嘅伯明翰6分，其實仲未扑鎚降硬班。上場作客俾榜尾打比郡迫和2:2當然失望，而餘下6輪賽程中除咗利物浦惡啃之外，其餘為雷丁、曼城、伯明翰同爭歐洲賽資格幾近絕望嘅樸茨茅夫，對手唔係高過自己太多五五波，睇嚟富咸仲有護級機會。呢場波對新特蘭，係最為重要嘅一仗。
如果兩隊逐個球員去秤，其實富咸質素相對較高，我認為卡馬拉、麥比廸、丹普西同西蒙戴維斯等嘅中前場力量，絕對好過客隊嘅韋赫特、安祖列特同堅韋尼鍾斯囉。上場睇新特蘭主場贏韋斯咸場波，第一是對手表現好差、反擊亦欠奉；第二是堅韋尼鍾斯門前執雞，有幾好組織？第三是如果唔係球證補時補到96分幾鐘，安祖列特邊有射門機會？最後贏到韋斯咸2:1，總覺得佢哋冇乜說服力。
近3次往績作客全輸
升上14位嘅新特蘭暫時壓力得到紓緩，領隊堅尼亦已經諗定下季會簽幾名頂級猛將加盟，睇嚟聯賽兩連勝之後，以為護級壓力細咗而有所鬆懈喎。雖然卡路士艾華斯及艾度曉因傷缺陣影響唔係太大，但係新特蘭自01/02球季開始喺英超同富咸交手，7戰只得1勝2和4負，當中3次到訪小屋球場錄得全輸！
富咸目前只剩番西蒙艾利洛一個傷兵，前鋒大衛希利傷癒復操，或有機會周六趕及上陣。富咸呢場波論戰意論往績都冇得輸，少讓平/半，我會嘗試去博上盤。
早飛王貼士
星期六19富咸vs新特蘭
首選：富咸（上）
次選：富咸大（2.1）
冷選：富咸勝2:1（7.5）
《周末早飛超級重心》
維拉洩氣保頓搶分良機
星期六17
阿士東維拉vs保頓1:2（15倍）
阿士東維拉要爭歐洲賽資格其實幾絕望，因距離第5位的愛華頓已達8分，近仗差勁的演出足證這班波已洩氣。保頓上場領先阿仙奴兩球下被反勝，士氣或多或少受損，但力爭護級之心不容忽視，縱續有路蘭停賽料仍可不敗。
韋根佔地利贏面高
星期六22
韋根vs伯明翰2:1（7.5倍）
韋根JJB球場不只是爛地，亦極為有運！今周除缺艾特文外，中場米高布朗亦要坐波監，守力轉弱及護級戰使然，博W及「大」。伯明翰兩名守將基度爾及列治維停賽，而麥法頓及卡普續因傷缺陣，受讓要唔過，但料前線應有入球。
愛華頓幾「大」都買
星期日25
愛華頓vs打比郡3:1（12倍）
愛華頓要追貼利物浦爭歐聯資格，同時亦要力保歐協席位，但卡希爾因傷缺陣之外，阿廸達亦傳有機會季尾離隊，損士氣，故首取「大」。打比郡已篤定降班，領隊祖維爾揚言給予年輕球員吸取經驗，放鬆踢更添「大」信心。