中大校友會聯合盃賽馬日，上星期日順利舉行。曾經在中大崇基學院肆業，主修中文，冇畢業嘅余伯樂以半個校友身份，應邀出席講貼士，余伯樂喺第三場請大家留意隻半冷門馬「精圖」，果然跑第二，資深校友李金鐘因此而中咗三重彩，收番一千二百五十四元，即刻笑到四萬咁口。
余伯樂為咗方便講馬，坐在台前，與資深校友何萬森及副校長楊綱凱教授同席。何萬森與余伯樂父親同輩份，知道余伯樂鍾意撰聯為樂，立即考吓佢。何兄話：「嗱，上聯係波士頓飛波士頓，好難對㗎！」波士，老闆也，頓，突然，即刻也，上聯意思係講波士突然間飛去波士頓（Boston）。點對呢，認真難搞。
余伯樂花咗十分鐘左右，寫出三個答案，但話明各有瑕疵，並非一百分之作。何老兄話：「收貨咯，你咁快想出三個答案，可稱鬼才！」余伯樂嘅下聯係：
（一）波士頓飛波士頓，自由神往自由神。
（二）波士頓飛波士頓，大衞營救大衞營。
（三）波士頓飛波士頓，比利時駐比利時。
睇落係及格之作，唔算好好，各位讀者如果有更好嘅下聯諗到出嚟，請電郵通知左丁山轉交余伯樂。
今年二月十日年初四本欄寫：「高人書法耀花市」，提起前輩高人王齊樂校長書法。王齊樂校長原來亦係何萬森老兄之教育界朋友。
王校長好客氣，喺年初六親筆來函云：「左丁山先生大監，時逢新春，恭喜鴻圖大展，事事如意……日來好友見報（即：睇到二月十日本欄）函電交馳，均以此為賀年佳話……」
《蘋果》讀者真係多，王校長及朋友均閱左丁山之「GG細語」，甚感汗顏。王校長賜函，左丁山喜出望外，連忙叫信差拎住幅字去大道中搵專家將幅字裱好，用玻璃鏡架載好，啱啱上星期先至收到，擺在會議室，日日睇吓，自我陶醉一番。