前晚花旗股市反覆偏軟，不過指數只係跌咗少少，老伯出席聽證會，雖然冇乜好嘢講，但只係交代近排經濟同銀行業嘅情況，所以股市仲企得住。
老伯話花旗上半年經濟會收縮，股民又估佢會繼續減息，估計下次會議減息半厘嘅人又多咗，不過，呢啲都係搵嚟炒作嘅藉口，減息同加息係一連串嘅步驟，喺正常情況唔會減吓又停吓，因為會俾市場唔明朗嘅信息，就算係減息嘅幅度都係咁，幅度會越嚟越細，直至唔減嘅時候就係整固期，情況好轉嘅時候就會睇機會加息，不過，整固期一般會比較長。
聯儲局會繼續減息
𠵱家花旗嘅情況好曳，減息唔會有起死回生嘅能力，就算有效，亦須時間發揮，繼續減息嘅最大好處，係等供樓人士減輕負擔，一方面減少斷供個案，另一方面可以減少消費收縮得太犀利嘅影響，所以，可以諗到聯儲局一定會繼續減息。
港股昨日繼續炒上，恒指破250日線收市，但成交就奀咗好多，個市下禮拜仲有得炒吓，但唔好當轉勢嚟炒，揀啱股票嚟炒好重要，因為下禮拜就算再升，都唔會係全面嘅升勢。
中石化C輪7880：中石化（386）昨收7.47元，升3巴仙，近排升勢雖然步伐好慢，但走勢算唔錯，短線可以試8.20元，破位睇8.80元，可以諗吓隻中石化C輪7880，隻輪昨收1.77元，槓桿率4.2倍（有效3倍），正股升上8.80元，7880應該喺2.80元水平，正股跌穿7元，隻輪就沽出止蝕。