有記者朋友忽然問到自己的飲食之道，第一反應是無言以對，皆因對食從來不講究，也不懂講究，但再三細想，原來飲飲食食是我睇波的興奮劑。
由小時講起，細細個如我有被老竇帶過入場的話，總會對冰菠蘿冰木瓜有深刻印象，當年觀眾興企起身睇波，小童們其實望極有限，都只是在大人的腳後玩耍咬瓜，雪糕筒當然也好食，只是街場外周街都有，反而是那些木瓜菠蘿，彷彿是球場獨家發售。
大一點兼職從事文字記者的日子，有一段時候常常要放學後趕到球場睇甲組波，時間趕急之下，永遠入場前都會記得買個飯盒入場邊睇邊食。豪一點加上有時間的話，就會買一盒烤雞套餐，有雞有粟米有薯蓉那款，豐富程度可以食足半場。
講波至愛食米線
趕一點的話，旺角場外有兩家快餐店亦有特快而廉飯盒，啱晒扒兩啖就開口大叫一通的球迷們。
從事講波工作以後，由於不時通宵直落，一些令人醒神的「鹹濕」食物是行家們至愛。至於本人還有另一心頭好──米線一大碗，皆因可以做一陣，食兩啖，兼且有湯底的關係，該碗米線竟有越食越多之感，越浸越漲也。
波與食之間，關係原來很親密。
文：馬啓仁