明珠台有個真人show《飛黃騰達》，由美國富商DonaldTrump主持，喺十幾個參賽者裏面勝出嘅，就可以做佢旗下一間公司嘅CEO。呢個橋段被鴻海郭台銘借用，佢早喺今年2月初已經講過，話4月1日就會退居幕後，為咗搵佢嘅接班人，就喺公司度搞咗個《鴻海版飛黃騰達》，而參賽者就係佢公司八大部門裏面嗰12個主管。
郭台銘咁做，原來唔係抄DonaldTrump，而係效法佢嘅偶像──台塑集團王永慶。郭台銘話會下放權力畀呢12位主管，用6年時間嚟觀察佢哋，同時郭主席會將公司重組。之後，佢會喺呢12個人裏面，揀最好嗰三四個出嚟，睇住重組後嘅公司，邊個做得最好，邊個就可以接棒。
喺《飛黃騰達》裏面，DonaldTrump每淘汰一個人，都係講「You'refired」，唔知郭台銘揀人嗰陣，又會唔會咁講呢？