朋友B興致勃勃去學打Golf已有年多，初頭係威係勢，仲買晒成Set球桿，點知就越打越差，猛咁呻自己無運動細胞，結果落重本買球桿。其實揀高爾夫球桿同買衫一樣，唔係名牌貴衫就一定着得好睇，最重要反而係識得揀，$500都夠買一支好桿！
攝影︰陳盛臣
網址：http://appleblogpaper.blogspot.com
aboutme:
Hallowina
超級饞嘴，相信幸福是吃一隻帶海水鹹味的肥美生蠔，滿腦都充滿美味食物，曾想過為好味的海鮮而移民澳洲，不過怕曬所以放棄。偏偏食量與身形不成正比，經常被人勸食多啲，實情係每日以優質食糧「餵飼」，胃部容量深不可測，可比黑洞。
買私家桿先揀7號
雖然一般練習場或者高球會都有球桿租，不過球桿始終都係貼身工具，打得咁上下始終想買支私家桿，但朋友B咁一買就買成Set：木桿、鐵桿、推桿加加埋埋有十幾支，就似乎太誇張！記得教練Marc話過︰「開始只在練習場打波，可以先從鐵桿7號入手，因為桿身長度適中，擊球時比較容易控制出球角度、高度，物料方面可選碳素桿，因為桿身較輕、較容易適應。」應付練習場一桿走天涯已足夠，但到你一落果嶺打波時，就發覺唔多夠用，教練說︰「根據國際賽例，最多可以帶一Set14支球桿落場，不過自己練習，有一支開波的木桿Driver、球道用的7號、8號桿及將球打入洞的推桿共四支就夠了。」
7號桿$500就夠好
朋友以為球桿越貴越好，結果波打得唔好就歸咎為自己無運動細胞，其實根本只係佢選錯球桿。Tony係CentreGolf經理，呢類Case見唔少，佢坦言$500左右已經買到一支唔錯的7號桿。雖然球桿係非常耐用，基本上可以用一世，不過球桿同衫一樣會過季，年年都有新製桿技術，所以其實唔使買太貴。Tony︰「好似呢一兩年先興的鐵木桿，混合鐵桿同木桿的特性，既可擊出遠距離的球，又可以掌握球的角度、方向同高度，而且容錯性好高，所以好快就取代咗桿身較長難以控制的球道木桿。」好似一Set裏面只係需要一支推桿，但係就有幾十種唔同形狀的桿頭，以前只有傳統的刀背桿頭，最近就興特大桿頭及低重心的MalletHead。其實一有新桿出就人人都趕住試，唔想落後於人，所以與其買一支勁貴球桿，不如買多幾支唔同功能的球桿，試吓新技術更加有發揮。
度身訂做私家桿
買完私家桿，下一步心癮起就想度身做私家桿。之所以要訂做，係因為球桿要配合到自己的體形同姿勢，就算名牌子都只係Ready-to-made，唔一定啱身，未必代表可以改進球技。但訂做就如旗袍一樣貼身，可計準每分每寸的位置，請教Tony關於訂做步驟，他說︰「度身球桿前，首先要做一個Interview，了解打波的習慣同遇到問題，然後就會量度身高、體重、手掌大小等，仲要做動態測試，分析揮桿的姿勢、力度等，綜合資料後就搵出適合的球桿，過程約45分鐘，而一套球桿最快三日就做好。」做一支球桿分為三部份︰桿頭、桿身、手柄，從資料分析，可找出唔同牌子的組件，桿身的長度、手柄的寬度全部都會作出修改，再組合就成為一支完全啱身嘅球桿。好喇，你實問我訂做一Set球桿要幾錢，講真的確係豐儉由人，由幾千到十多萬都有，不過肯定的是，最平$6,000一組八支鐵桿都會比買$8,000的現成貨好得多！（度身訂做費用$588）
訂做一支球桿，可分開手柄、桿身及桿頭三部份，揀取最合自己的型號，才重新裝嵌成一支私人球桿。
最新回應
may︰我暫時都只係去練習場打波，有時都覺得租返嚟嘅球桿唔多就手，但係都要玩到一年左右先會考慮買球桿。
Dick︰$500一支球桿，價錢其實同買網球拍都差唔多，都買得過吖。
相關超連結
http://www.twgolftech.com/home.php
TomWishon官方網站，詳細介紹度身訂做球桿的資料及先進的球桿技術，更有不同號數的球桿用法介紹等，非常仔細。
售賣點：
CentralGolf（21406633）
中環夏愨道12號美國銀行中心G3舖