某天中午，政府總部Canteen……
公務員A：「喂，成個禮拜唔見人，放大假呀？」
公務員B：「係呀！啱啱攞咗OEA（編按：即公務員海外教育津貼，OverseaEducationAllowance）送個大仔去英國讀highschool，所以請咗一個禮拜假陪個仔過去英國搞入學手續囉！」
公務員A：「點解唔索性請多兩個禮拜假去歐洲玩呀？」
煲呔對公務員嘅德政
公務員B：「我都想㗎，不過我老細今日開始放大假，我要留喺度act佢個位呀！不過等佢返嚟我都要放㗎，我儲埋成170日假，再唔放就爆假㗎喇！（編按：97前入職的公務員一般每年有40.5日大假，最多可儲180日）」
公務員A：「哈，其實我哋一年咁多日假，加埋公眾及法定假期，𠵱家又行埋五天工作制，計吓計吓一年差唔多有三分一時間唔使返工！」
公務員B：「所以我話煲呔真係醒囉，識得搞五天工作制，簡直係特區成立以來最大嘅德政，唔使花費額外資源就贏晒我哋啲公務員嘅掌聲！以前老懵董就唔識咁做喇！」
公務員A：「鬼咩，阿董成世都未打過工，點似得煲呔咁由低做起，會明白我哋啲打工仔嘅心態㗎？」
公務員B：「係呢，咁你呢排有乜搞作呀？」
公務員A：「無呀，上個月財政年度埋單計數之前，我哋個office為咗要一次過使晒未用完嘅錢、以防俾Treasury（編按：即庫務科，TreasuryBranch）搵藉口減資源，所以夾硬買咗幾十部彩色printer、數碼相機同PDA。啲貨過兩日就會送嚟，但係office個貨倉又爆晒棚，𠵱家仲頭痛緊唔知啲嘢可以放喺邊。」
公務員B：「嘩，乜你咁落後㗎，𠵱家仲會搞埋呢啲年尾大採購，學吓我個office啦，我哋每個月都會睇住盤數，隔兩個月度就大手筆買一次嘢，咁就唔使谷埋財政年度完結時，先嚟頭痛唔知點樣使錢。」
頭痛點可使晒啲錢
公務員A：「有道理，嚟緊呢一年我都要學吓你先。咁你呢，呢輪又有搞緊乜呀？」
公務員B：「呢輪忙於籌備薪酬趨勢調查呀。」
公務員A：「係喎，聽講阿財爺已經一早喺財政預算案度作出撥備，睇嚟今年加人工都無走雞喇！」
公務員B：「梗係啦，玩程序我哋公務員最叻㗎嘞！問題係最後加幾多囉。」
公務員A：「之前幾年香港經濟差，我哋俾人鬧足咁多年，資源就狂cut。𠵱家經濟好番、庫房水浸，大把部門等住請人同開位，睇嚟我哋都算苦盡甘來喇！」
公務員B：「讀書都有教啦，柏金遜定律，官僚機構生命力幾頑強至得𠺝！」
公務員A：「話時話，canteen啲嘢好似越嚟越難食。」
公務員B：「聽日出糧，一於book定枱去鏞記食燒鵝啦。」
公務員A：「好提議喎，咁聽日call你喇！」
公務員B：「好呀！」
http://penandsky.blogspot.com