美國民主黨總統候選人初選，希拉莉與奧巴馬殺得難分難解，一定會鬥到入直路，由幕後拉票決定勝負；奧巴馬話：「呢齣戲拖得太長」，希拉莉話：「我喜歡長篇電影。」可說針鋒相對。民主黨元老想話勸退希拉莉，仲妙想天開到搵戈爾出山取代兩人，當然唔會成事，係一啲民主黨人一廂情願而已。
喺香港睇電視（CNN、霍士）直播奧巴馬與希拉莉演講，前者動聽得多，佢哋兩位都係律師，奧巴馬可能做慣教授（芝加哥大學），慣咗講書，說服力特別強；希拉莉就似律師陳述案情，平實而不動聽。唔怪得奧巴馬憑一把嘴就可贏到年青人嘅擁護，聲勢大增！講真，佢嘅外交經濟政策，至今為止，十分空洞，得個講字而已，但競選時十分講究演說煽動性，呢方面奧巴馬贏到離行離列，唔怪得《亞洲週刊》記者陳之嶽報道，「奧巴馬演說媲美林肯、甘迺廸。」
香港政壇有冇奧巴馬呀？未見過，如果有嘅話，左丁山一定第一時間去聽佢演講。星期一睇《信報》余錦賢寫「方卓如再戰會計界」，講到「像龔耀輝這種奧巴馬式人物」，幾乎嚇了一跳。據余錦賢講，會計師龔耀輝（前GrantThornton合夥人）就係曾在《信報》及《蘋果》寫過稿嘅「方卓如」。方卓如嘅專欄有睇過，內裏有好多金融界術語，一般讀者唔會睇得明白，只合中環金融界人士睇，左丁山一路都唔知「方卓如」係邊個，只以為佢可能係投資銀行家或一隊金融界人士聯手寫作，經余錦賢揭曉謎底，方知「方卓如」就係會計師龔耀輝。呢位余錦賢筆下嘅香港奧巴馬𠵱家係「中國金融租賃集團」（ChinaFinancialLeasingGroup）行政總裁，在灣仔與北京朝陽區有辦公室，聽講經營中國大陸租賃（leasing）生意，龔總裁要經常到中國公幹傾生意，業務繁忙，好唔得閒。
既然如此，龔會計師有意出戰會計界功能團體選立法會，可說甚有政治興趣；佢係唔係奧巴馬咁勁呀？未聽過佢演講，暫且存疑，唔係好信啫，通常會計師嘅口才一定係不如律師嘅，余錦賢太客氣啫。他日如果佢當選，有會計師資格而唔做會計師，只從事金融租賃，如何代表會計界呢？如果佢真係香港奧巴馬，大概冇問題啩？