坐擁二千億美金資本嘅中投，有人預測若干年後會成為全球最大嘅主權財富基金，講得一口流利英語嘅中投副總經理汪建熙，噚日應瑞信邀請作午餐演講。中投舊年入股黑石，後者上市以嚟股價插水，令中投揸fit人承受唔少批評，之不過，汪副總嘅心情未受影響，噚日風采依然，繼續一貫妙語如珠嘅本色。
講開黑石，Jesse（汪之洋名）好抵死咁話，自己不嬲都「唔太好IPO（新股認購）」，好可惜佢嘅同事係「典型中國同胞」，即係堅信投資新股必賺嗰隻，所以家陣中投名下部份投資，以市價計已跌破招股價。
錢雖然冇人嫌多，不過汪副總就話，水頭充足但欠缺國際投資經驗嘅中投，麻煩正正在於太多錢但冇乜回報，所以佢呼籲現場嘅基金投資界專才，不妨考慮過檔中投，仲話人工唔差㖭。
汪建熙跟住匆匆離開，原來趕去金管局，行程仲俾台上嘅瑞信中國區主管張利平「事先張揚」，據聞汪副總去會晤金管局銀行監理部助理總裁阮國恒，唔知係咪為農行重組取經呢？