李進喺李澤楷（小小超）旗下嘅大國文化唱片公司做咗七年揸弗人，最近有消息話佢已經向小小超辭職，五月就會正式離任，之後佢會自己開設一間新娛樂公司，聽聞呢間公司背後有外國同內地財團支持，主要以做騷為主，嚟緊頭炮會主辦日本人氣樂隊XJapan來港嘅演唱會、又會搞前披頭四樂隊成員保羅麥卡尼（PaulMcCartney）同英國組合PinkFloyd嚟香港、澳門同內地開演唱會，相信李進離開大國文化後，一樣會有一番新作為。
「追求理想」
其實近年嚟李進喺大國文化，主要業務都係經常飛嚟飛去搵藝人嚟亞洲開騷，好似將經典百老匯歌劇《歌聲魅影》（PhantomoftheOpera）帶嚟香港公演，呢個騷幫大國文化賺咗一大筆，但當中有啲騷都係要蝕本嘅，不過咁多年嚟佢嘅國際人脈已經打得好唔錯，所以都係時候出嚟自己做老闆。
噚日馮仁昭打電話畀李進求證，佢話：「做咗大國文化七年，好多謝李生一直對我嘅支持，但每個人到某個階段，應該去追求自己嘅理想，到一個適當時候，我會話畀大家知有乜新搞作。」