任賢齊下月初會在紅館舉行兩場「Love&Belove慈善演唱會」，近日更進入作戰狀態。小齊前晚帶了兩位女fans亮相《蘋果》網站直播節目《娛樂開CHAT》，小齊自彈自唱《還有我》和《對面的女孩看過來》，其中一個女歌迷更用手語演繹歌詞內容，讓失聰人士都可分享。
一直歌影兩忙的小齊，問到電影上最想與那一位女藝人合作，他說：「我最想同Maggie（張曼玉）合作。」小齊又慨嘆過往的大銀幕演出都無緣與女主角親嘴，問他可想與張曼玉激情一咀，小齊尷尬以笑回應。大家可登入《蘋果》網站 http://ent.appledaily.com隨時重溫節目。
採訪：懷鈺 攝影：葉君海 協力：胡比
髮型：CliffChan（HairCulture） 化妝：AngelYip
開騷玩手語 何文田 Shirley
Shirley：我想問小齊會唔會喺演唱會上唱廣東歌？
小齊：都會㗎，其實我好少唱廣東歌，通常都係唱人哋嘅歌，今次我會試吓唱我唱過嘅歌，但我驚你哋聽唔明。
Shirley：唔會唔明。我仲想問吓你會唔會有其他樂器？除咗結他同口琴之外。
小齊：其實大家都好想有啲特別嘅嘢，例如拋橙呀、吞劍呀！
懷鈺：呢啲好似係雜技喎？咁樂器呢？
小齊：今次我想有多啲嘢畀大家睇，我哋會努力，𠵱家已經有好多嘢喇！
Shirley：梗係啦！我哋會參加小齊演唱會上嘅手語環節，點樣可以唔緊張呢？
小齊：要面皮夠厚囉，其實我有次喺我演唱會上，見到台下嘅fans喺度做手語動作，呢啲都係一種舞蹈，所以想加落去演唱會度。
兩個夠晒數 黃埔 鳥鳥
鳥鳥：小齊，你咁鍾意小朋友，有冇諗住再追多一個呀？曾生話要三個喎？
小齊：嘩，邊個幫我湊呀？
鳥鳥：我可以幫你湊㗎，我識㗎！
小齊：吓？你幫我生？
懷鈺：唔係呀！佢話幫你湊呀，唔係幫你生呀！
小齊：唔會喇，sorry，夠喇。因為工作嘅關係，已經唔可以成日陪屋企人，所以唔會喇。
懷鈺：其實已經一個好字啦！
小齊：係啦！
準備好犧牲 沙田 Lily
Lily：如果李安搵你拍《色，戒》易先生呢個角色，你想搵邊個做女主角呢？會唔會係你偶像張曼玉呢？
小齊：我未諗過，我覺得呢個唔係我哋演員可以選擇嘅，如果我真係拍呢個角色，我心理上都要準備好好，因為要喺咁多人面前犧牲，拍呢啲鏡頭唔係一件容易嘅事。
