何定鈞入主亞視之後，果然有一番搞作，噚日亞視又有新搞作，喺半島酒店開記招，宣佈招攬咗一班亞洲模特兒擔任新頻道魅力資訊頻道代言人。
10位ImageGirl入面，最為人熟識嘅係吳浩康女友莊思敏，吳浩康係無綫合約歌手，豈不是同男友打對台？莊思敏話：「我哋同亞視係冇合約，只係佢哋同我哋公司合作。」莊思敏亮相亞視，吳浩康唔知有冇意見？莊思敏話：「我同佢提過，佢冇表示贊成又冇反對。」莊思敏好想拍戲同做主持，可以多方面嘗試，總之乜嘢機會都唔會放過喇！佢仲透露會喺《十大廣告》度表演肚皮舞，展露自己嘅舞技。
陳啓泰任司儀
今次記者會嘅司儀陳啓泰，喺記者會上第一時間報喜，佢話：「《今日法庭》星期六特別版有九點幾收視，好多人都係嗰日先知有呢個節目，咁𠵱家周一至周五又對住安仔（郭晉安）個劇，所以收視係差少少。不過，播完佢套劇應該會好，係安仔呢個劇好，唔會個個劇都咁強。」
