退休高官真係唔愁出路，噚日又多一個活生生嘅例子！今勻主角係前任民航處處長林光宇，佢嘅新銜頭係嘉華國際集團營運總監，呢個消息仲係由集團主席呂志和，喺噚日舉行嘅業績會上親口公佈，可以話係畀足面。
04年3月退休嘅林光宇，今年63歲，做咗41年官，62年尾加入民航處做航空交通控制助理員時，只係得18歲，到94年升任機場總經理，96年中做埋民航處副處長，98年正式坐正做一哥；退休之後都做過唔少公司嘅執董同非執董，今次履新，算係事業上嘅第二春。
除咗林光宇之外，嘉華仲有警隊前一哥許淇安坐鎮，家吓佢做緊署理董事總經理，華華問過呂志和，因乜解究咁鍾情班前高官？佢笑笑口話：「老友囉！」跟住就話，主要係唔想間公司咁重家族色彩，同埋引入多啲專業管理喎。