江美儀同吳君如胞弟吳君祥（Vincent），喺04年擦出愛火，至今拍拖已經三年，江美儀早前做咗割除子宮瘤手術，舊年又約滿亞視，乘機休息咗一年。有消息話佢同Vincent感情穩定，睇見君如同老公陳可辛嘅婚姻咁幸福，仲生埋可愛嘅囡囡陳是知，恨嫁嘅江美儀唔聲唔聲喺舊年做咗豬新娘，秘密同Vincent結婚。
馮仁昭噚日打電話恭喜江美儀做咗吳太，佢仍然口密否認，佢話：「我未結婚喎，佢只係我條仔，我認就好蝕底，可能我哋成日出雙入對，形影不離，人哋先至誤會啫。」
一家相處融洽
江美儀又話：「我年紀唔細，𠵱家有個伴陪我過日子，都好開心，無謂搵嘢出嚟搞，我哋好安於現狀。」江美儀同Vincent一家相處融洽，佢話：「冬叔（夏春秋）、君如同Peter（陳可辛），我哋大家都係呢行，平時都有共同話題。」江美儀去年約滿亞視後，回復自由身嘅佢近日同梁思浩拍檔，以嘉賓形式主持港台節目《瘋Show快活人》。
此外，Vincent曾經同過亞視女優、即吳國敬舊愛仲春菲拍拖，而江美儀就同過張瑛個仔張煒有過一段情。