日本每年一度嘅高校（高中）棒球賽，喺三月二十二、二十三日舉行，全國電視直播，報紙大篇幅報道。高中比賽都咁巴閉？第一個原因係棒球係日本最流行體育活動，觀眾多過晒足球、籃球，況且近年日本唔少棒球明星輸出美國，證明咗日本棒球員達到世界最高水平。第二，日本大學體育好難同美國相比，完全引唔起觀眾興趣（除咗早稻田與慶應大學嘅棒球對抗賽），日本職業棒球隊每年從高中棒賽揀蟀，表現得好嘅棒球員大有前途。
美國球會就從NCAA揀蟀，每年NCAA籃球賽在三月中下旬舉行，稱為「瘋狂三月」（MarchMadness），NCAA籃球賽年年有冷門爆，今年有間小學校叫做DavidsonCollege，佢於北卡羅連納州，離首府Charlotte兩個鐘頭車程，只有一千七百名學生，居然打入十六強，震驚一時，呢間學校立即乘機宣傳，免費送學生去睇十六強比賽，在美國聲名大噪，宣傳效益之大，幾百萬美元廣告費都買唔到，可見一支學校籃球隊在NCAA贏完又贏嘅話，即使最後攞唔到冠軍，仍然得益無窮。
既有如此效果，著名大學亦見獵心喜，最著名嘅長春藤大學（哈佛、耶魯、普林斯頓等）讀書就最叻，打籃球從來水皮，佢哋只係玩自己嘅「長春藤聯盟賽」，參加NCAA比賽就冇乜希望。但哈佛去年竟然「把心一橫」，決心改組籃球隊，教練在全國招兵揀蟀，令其他長春藤大學為之側目。打籃球最好嘅球員，通常讀書成績唔好，點入哈佛呀，於是哈佛受到其他長春藤大學質疑，懷疑哈佛為咗延攬好手，降低學術要求，哈佛自然例牌否認。
籃球竟有咁大魔力，連哈佛都要猶抱琵琶半遮面咁樣搵好手，我哋真係好難理解。不過有一樣嘢大家都知道嘅，香港小學生運動表現出色嘅話，入喇沙、男拔嘅機會肯定高一籌！讀書講勤力，打波亦唔係純粹靠天才，今年WestVirginia大學有位球員叫做JoeAlexander，少年時跟父親住過好多地方，包括泰國、香港，佢自小一個人練籃球，練到不眠不休，返到美國，直情練波練到在球場瞓地板，卒之一鳴驚人，成功之路係由血與汗鋪成嘅。