美國聯儲局與JP摩根大通挽救（bailout）貝爾斯登，實際上係強行干預市場，美其名曰穩定金融體系。相信我哋曾特首睇到，必定陰陰嘴笑，因為美國佬以前曾批評特區政府在一九九八年干預香港股市也。有咗次按債券風暴之後，全世界政府都變成凱因斯學派，芝加哥市場理論被踢埋一邊。總之平時可以講市場調整，一到自己荷包受損，啲大銀行大企業一樣伸手向政府求救，打納稅人荷包來挽救自己因經營不善而面臨破產嘅情況。
既然美國聯儲局挽救貝爾斯登，美國民主黨人立即高呼為何挽救WallStreet（華爾街）而唔救MainStreet（大街，即普通人民居住地方）？平時不計後果而盲目買大屋之人唔係比盲目買賣次按債券嘅投資銀行更蠢嘅啫，點解唔值得挽救？咁講法，或者美國會採用中國經濟管理模式，乜都管埋。
人蠢冇藥醫，政府蠢冇得救。三月二十七日喺東京睇到一段新聞，就係東京市政府議會在老大不願意情況下，通過注資四百億日圓挽救東京市營「新銀行」（Shinginko）。市政府開辦一間銀行做乜嘢呀？原來在○四年石原慎太郎（東京都知事，即係市長）竟可以搞掂市議會，以一千億日圓資本，再發行一百億日圓債券，成立呢間「新銀行」，經營宗旨係向東京中小企提供無抵押無擔保貸款，但利率就比較高，以為咁樣可以為中小企解決難以籌措資金嘅困難。好嘞，開辦三年，間銀行已經蝕足一千億日圓，陷於資金不足境地，標準普爾將該銀行嘅債券評級由BBB下調至BBB--。
東京市民對注資大表不滿，但石原慎太郎話假如「新銀行」關門，對中小企業會造成好大困難，一於要救之。《日本產經新聞》稱注資四百億日圓為「窮餘之延命策」，呢條標題又幾「中文化」噃，左丁山唔識日文都欣賞呢個標題。石原慎太郎好明顯完全唔識銀行經營之道，無端端為東京市民帶來大量虧損。啲不懂市場，只識扮救世主嘅政客確實害人不淺。