今日33歲生日的鄺文珣，將於8月做媽咪！前年她與商人應德榮結婚後，去年造人成功，兩人前晚恩愛出席東華晚宴，挺着大肚子的鄺文珣看來容光煥發，她還謂已為人母的徐子淇教導她不少安胎禁忌。
鄺文珣前年平安夜下嫁經營家族製衣生意的商人應德榮（Andrew），婚後過了年多二人世界，便急不及待為家庭增添新成員。鄺文珣前晚與夫婿在灣仔君悅酒店出席東華董事局就職及聯歡晚宴，穿上吊帶高腰娃娃裙的她，腹部隆起，Andrew則伴在她身邊，兩夫婦均掛着幸福笑容。
曾經暈倒街頭
記者昨日致電鄺文珣，求證她是否懷有身孕，她直認不諱說：「係呀，我有咗幾個月，8月係預產期。」如此推算，鄺文珣已有約五至六個月身孕，問她有否照超聲波分辨BB性別？她說：「都知道性別，但我唔想講住，呢次有BB都係意料之中，有咗後我都好少出街，老公好緊張，試過有次我因為血糖低喺街頭暈低，之後老公都唔想我自己出街。」
談到好友徐子淇已有一女，正好做鄺文珣的軍師，教導她安胎知識，鄺文珣對此說：「我都有聽吓音樂畀BB胎教，子淇做咗我半個醫生，佢將一啲章程同禁忌攞畀我睇，教我邊啲嘢唔食得，不過我有時都忍唔到口要偷食。」
懷孕情緒激動
問鄺文珣可希望一索得男，與子淇愛女李晞彤對親家？她說：「我哋冇講呢啲嘢，反而講好多同小朋友返學有關嘅嘢，子淇成日話自己做咗白老鼠，自己試咗先，做咗我生BB嘅盲公竹，真係唔話得。」鄺文珣又謂懷孕後有時情緒激動，駕駛期間需要聽音樂紓緩一下。
採訪：梁錦雯 攝影：陳志嵐
