五年冇見，你過得好嗎？自從你離開之後，我屋企冇再放鮮花，只係放襟擺嘅植物，例如竹；但可能因掛住你，呢幾日連棵竹都好似唔開心，又瘦又黃！
六年前喺一間disco搞嘅慈善活動，你突然出現，仲話只要捐錢就可以同你影相，我即刻仆埋去，心諗：「一定要攬住你先得。」排排吓隊差唔多輪到我，先發覺銀包放咗喺衣帽間，即刻跑出去攞，但返轉頭你已經走咗。當時仲以為一定仲有機會嘅，點知大半年後嘅4月1號，你真真正正咁離開咗。
為咗棵水種嘅富貴竹，噚日請教鮮花及盆栽批發商會主席賴榮春，佢話富貴竹其實要較多鐵質，可以放粒鐵釘落去，滲出嘅鐵質可以成為竹嘅養份，會生得靚啲；同樣道理，水種嘅鐵樹都可以放粒鐵釘落去。臨池自照嘅水仙雖美但太短暫，我𠵱家寧願選擇耐看嘅竹，因為唔想再次承受失去嘅失落。Dedicatedto哥哥。
逢周一至周四刊出