女子組合Twins成員鍾欣桐（阿嬌）牽涉入淫照事件後，她一番好天真好儍的說話，令其人氣急跌，「天真嬌」最近更處於長休狀態，身邊又有富貴男友麥浚龍照應，令Twins備受拆夥傳聞困擾，但這促使另一隊女子組合HotCha乘勢上位。HotCha前晚亮相《蘋果》網站直播節目《娛樂開Chat》，談到勁敵Twins，成員Crystal說：「冇得比較，我哋想畀人知道我哋係跳舞組合，希望以跳舞形象作多方面發展。」那麼可會視Twins為目標？HotCha說：「當然想，其實好多成功嘅藝人都係我哋嘅學習目標。」難怪HotCha近日積極練舞搶灘，不過她們坦言曾遭人白眼，還令她們流淚呢。大家可登入《蘋果》網站 http://ent.appledaily.com重溫節目。
採訪：懷鈺 攝影：陳慧安 服裝：Password
患病見真情
東區 牙恆
牙恆：我想問你哋拍邊一首MV最辛苦？
HotCha：我諗係去馬來西亞嗰次。
王友良：唔係去日本嗰次咩？嗰次你哋去日本拍MV時好凍喎。
HotCha：日本嗰次都辛苦，但馬來西亞嗰次仲辛苦。
Regen：我嗰次去到拍MV，又嘔又發燒，可能因為腸胃唔好，又冇得睇醫生住，所以好辛苦。其他兩位成員夜晚又要照顧我，幫我抹汗，諗起都辛苦。
Crystal：嗰次拍MV，見Regen病咗，我心情真係好忐忑，又擔心佢嘅病，自從嗰次後，我哋嘅感情加深咗。
入行遭白眼
九龍城 阿威
阿威：你哋入行後有冇遇到一啲事令你哋想過放棄？
HotCha：冇想過放棄，但有唔開心、有壓力囉，試過初入行時，好想人哋認識我哋，但人哋啲眼光係你哋三個喺度唱乜呀、喺度跳乜呀，嗰啲眼光令我哋好難受，因為咁，我哋三個都試過為呢啲事喊過。
享受拍戲樂
小西灣 Karen
Karen：Hello，我想問吓你哋，最鍾意邊一首歌？
Crystal：我最鍾意係《你的味道》，因為放咗好多心機落去，首歌嘅曲詞都寫得好好。
Winkie：我就貪心啲，鍾意兩首歌，就係《唯一的你》同《咖啡或茶》，兩首歌都係R&B感覺、輕快啲嘅歌，因為我鍾意呢類型。
Regen：我都係鍾意《咖啡或茶》，因為我都係鍾意R&B嘅歌，歌詞又表達到女仔三心兩意嘅心理。
Karen：你哋鍾意拍戲定拍劇呀？
Regen：我鍾意拍戲，因為我想喺戲院嘅大銀幕度睇到自己個頭呀。
Winkie：我都鍾意拍戲，因為我好享受買飛入場嘅感覺，不過拍劇都正嘅，希望兩種都試晒。
