樂基兒被傳與黎明結婚後，如常做模特兒工作，密密行騷賺錢。昨日她笑住應「黎太」稱呼，不過做了黎明身邊女人多年，原來樂基兒從不看黎明的電影，認真不畀面。
英倫品牌Joseph在銅鑼灣開舖，昨日舉行08春夏時裝騷，找來樂基兒、周汶錡及四位模特兒示範新裝。完騷後，記者稱樂基兒做黎太，樂基兒甜笑說：「ThankYou！」之後笑住說：「我講笑咋！」問她是否做黎太後，要收起性感？她說：「唔關做Leon女友嘅事，我行騷性感啲係冇所謂。」
出碟先睇
黎明主演的電影《江山美人》上畫，問樂基兒有否捧場？她說：「未呀，等出碟囉，我一向都冇乜睇佢嘅戲，其實都未睇過，因為雖然中文戲，又有字幕，但我都唔係好明。」不過她強調有聽黎明的歌。
曬得一身古銅色的周汶錡，以亮麗鮮黃裙搶鏡，她大讚Joseph的服飾說：「我之前喺英國都成日買，𠵱家香港開舖，好方便，頭先已經忍唔住買咗幾件先開工做騷。」
取材夢露
Joseph今季以瑪麗蓮夢露（MarilynMonroe）的衣櫥為概念，將性感自信與小女孩式的天真無邪，融為一體，再加入巴黎典雅與倫敦冷靜的格調。新裝備獨特布料的tweedsets、以短身及極長的剪裁作平衡的外套組合，還有輕盈又性感的娃娃裙等。
色彩猶如明星的彩妝盒，深藍、紫紅、磚紅及鮮黃等，並從AndyWarhol及SoniaDelaunay作品取得靈感，炮製泡泡及方形圖案等。
採訪：RitaLeung
攝影：MatthewLam
