08京奧聖火噚日開始環遊世界，呢場13.7萬公里「長征」，經歷19個國外城市、115個國內地區或城市，為期98日。我求大俠呢刻當然好興奮，不過聽講阿根廷站其中一個火炬手係馬勒當拿時，突然背脊凉一凉。
象徵如意吉祥嘅「祥雲」號火炬，本月11日從洛杉磯降落阿根廷首都布宜諾斯艾利斯，展開南美唯一一站嘅行程。據《新華社》報道，球王馬勒當拿（老馬）或負責第1棒，不過老馬話到時未必喺國內，如果趕得切返歸就參與喎！
我求大俠之前講過老馬唔多想參與迎接聖火，扭扭擰擰到𠵱家都未firm實，好唔畀面啫！其實，阿根廷奧委會一直冇打算邀請老馬，因為佢從未參加過奧運會比賽，唔符合火炬手嘅資格；只不過係布宜諾斯艾利斯市體育部長艾拉，先跪落地求老馬啫！
好彩有「巴廸高」補鑊
話說回頭，如果真係由老馬做第1棒，未必係好事。因為佢年紀有番咁上下，容乜易跑跑吓仆低，又或者手軟跌咗支火炬，到時就真係累街坊啦！雖然當日老馬負責路程唔算長，不過佢身體一向唔多好，分分鐘打個乞嚏就出事㗎！
好彩，阿根廷方面已經安排咗12位火炬手參與盛事，包括廸阿歷山度同基利干沙利斯兩位球星，周二仲突然宣佈超級球星巴廸斯圖達都會參與埋一份。呢位射手同老馬並肩出戰94世界盃，人品、體能等各方面都冇得彈，仲一直覺得冇參加過奧運好遺憾，今次可以參與傳送聖火算係一種彌補，不知幾開心！
其實，既然老馬咁神神化化，隨時搞出大頭佛，不如阿根廷方面考慮下畀「巴廸高」跑埋老馬嗰份好過啦！