旋鈕選檔　真正轉波

向來係英國紳士嘅Jaguar，今日似乎要擺脫呢個傳統枷鎖，佢哋新推出嘅車款，由內到外都改用年輕Style示人，新到港嘅XF就係最佳示範。最叫人眼前一亮無疑係個旋鈕波檔選擇器，你着車嗰陣會自動升起，熄車嗰陣自動返回原位㖭！型！

記者：鄭達基
攝影：陳陶鈞
模特兒：Tiffany（TheGroup）

波棍？Out啦！

撇除造型同車廂陳設呢兩個課題唔講住，先講吓全新JaguarXF嘅機械配搭。呢部XF3.0SE，係以一台可輸出238匹馬力嘅3.0V6引擎作核心，另外仲配備咗ZF提供嘅6前速半自動波箱。
呢台3.0V6引擎好力運轉寧靜就唔使多講，最巴閉都係嗰套6前速半自動波箱。事關佢唔係見慣見熟嘅J型排列，而係變咗做旋鈕！試車前未着車，我搵嚟搵去都搵唔到佢喺邊，及後代理朋友同我講話着咗車就搵到㗎啦。哈，原來只要先按下不停閃動嘅引擎起動鍵，波檔旋扭就會自動升起，熄車後又會縮低歸位，得意喎！另外，如果想學手波車咁拖波嘅話，用設喺軚盤後方嘅+/-轉檔撥片就搞掂，好玩到震。

■只要一着車，波檔選擇旋鈕就會自動升起，可以話係近年汽車少見又新鮮嘅設計。

CyberLook代古典味

講番XF嘅車廂陳設，除繼續以空間闊落同埋高級真皮座椅做賣點外，裝飾面板亦由以前嘅桃木佔大多數變成金屬同真皮，望落感覺後生好多。中控台設計亦有好大改變，音響同冷氣系統都可以用頂端嘅輕觸式屏幕做調校，而旁邊嘅冷氣風口仲會喺着車時先翻開，翻開嗰陣好似一隻豹睡醒咁，感覺好惡呀！至於造型，我同隨行嘅攝影師都覺得XF變得好流線型，而車頭部份就更加突出，尤其係用咗超大頭燈同電鍍網狀嘅方形鬼面罩之後，觀感有啲似日本車，無疑，徹底以新形象示人嘅Jaguar，猶如年輕才俊。