張國榮（哥哥）逝世5周年活動經已圓滿結束，在前晚舉行的紀念音樂會上，曾經與哥哥合作拍攝過經典電影《春光乍洩》的梁朝偉，及《金枝玉葉》的袁詠儀（靚靚），分別獻唱及致悼辭，偉仔希望每年都舉辦悼念活動，而袁詠儀則暢談與哥哥生前的拍戲趣事。
為紀念張國榮逝世5周年，前晚在紅館舉行「MissYouMuchLeslie繼續寵愛音樂會」，梁朝偉及袁詠儀也是嘉賓之一，偉仔獻唱一首《風繼續吹》，而袁詠儀則上台致悼念辭，她大爆哥哥生前是一個貪玩的大細路。
首日開工被寸
袁詠儀說：「好榮幸哥哥係我攬過嘅對手之一，同佢拍戲印象好深，當我知道要同佢合作嘅時候有啲驚，記得第一日開工我好準時，點知哥哥仲早過我，佢好寸咁問我：『聽講你記性好好喎！』我當時心諗使唔使咁寸呀？於是我答番佢話：『OK啦！』不過嗰日有場戲我NG咗9次，我真係徹底咁俾哥哥打敗咗！好在哥哥冇面黑，我問佢點解唔鬧我，佢話唔想畀咁大壓力我，所以我𠵱家拍戲對住對手都係用呢個態度。」
打羅家英屁股
袁詠儀續稱：「每次同哥哥拍戲，都似過緊SummerHoliday咁，仲有佢好鍾意整蠱人，好似同佢拍《金玉滿堂》，導演徐克係好嚴肅，有次哥哥竟然拎住條道具魚玩，佢一見徐克就掉走條魚，我都未見過佢掉得咁快，佢真係一個大細路。又有一次我哋一齊同羅家英（行哥）拍戲，哥哥笑笑口話唱粵曲嘅人個屁股特別翹，於是佢走去用手打行哥個屁股，點知畀行哥開玩笑咁鬧，哥哥笑住讚行哥係大老倌，唔好怪佢，哥哥又驚又要玩。」
袁詠儀表示電影中的哥哥好有型，私下卻很樸素，她說：「雖然哥哥啲腳毛好多，但係只要佢着起戲服，佢就係SuperStar，五年喇！感覺好似係大家喺列車上，有上有落，哥哥只係早咗落車，總有一日大家會喺終站再聚。」
偉仔年年追悼
此外，梁朝偉獻唱了一曲《風繼續吹》，偉仔說：「真係幾緊張，我好集中精神去唱，不過可能戴咗耳機嘅關係，所以聽唔到台下觀眾嘅反應。我唱嘅時候有諗起哥哥，可以參與呢次悼念活動覺得好溫馨，好有意義，其實可以每年都搞。」
記者問起有關當年劉嘉玲誤將張國榮當是哥哥，但其實哥哥是指唐唐才對，偉仔表示，這個他不清楚，因為識張國榮時已稱他為哥哥。
採訪：馬建華 駱華齡
攝影：仇志德
