今年8月北京搞奧運，嘉華國際（173）主席呂志和一早開晒聲恨睇，但係啲門券（尤其係貴價飛）唔易撲到，早前阿仔呂耀東用咗100萬銀，競投咗兩張開幕入場券，華華同呂志和提起呢件事，佢笑笑口話，100萬銀買飛都係為做善事，唔算貴──跟住補咗句──「不過，家吓都唔知係咪畀我嘅？」
咪以為淨係後生仔先至鍾意打扮，其實唔少上咗年紀嘅富豪，着衫配襯都好有個人風格，好似77歲嘅呂志和咁，近幾年無論出席大小場合都好，總會戴住頂帽，仲係俗稱賊仔帽嗰款，型到爆之餘仲可以擋雨遮陽光，呢種造型家吓變成佢商標。
聽李光耀講 退休老得快
噚日嘉華國際業績會，呂志和着深色西裝打紅色呔，襯頂灰色賊仔帽，仲專登揀頂防水嘅質料，可能係擔心落雨。華華好奇問佢，屋企藏帽量過唔過百，佢笑晒口話：「邊有咁多呀！」然後補番句話，幾十頂就差唔多，都係朋友同仔女知佢鍾意戴帽，周不時買嚟送畀佢。不過華華見佢啲帽款款差唔多，雖然質地有啲唔同，但都係黑黑灰灰嘅冷色，唔細心睇未必留意到有乜分別。
咁老當益壯兼且仲好貪靚嘅呂主席，有冇諗過退休呢？佢答話退休就唔會喇，至多做少啲，交畀班仔女，自己量力而為囉！佢同華華講：「前新加坡資政李光耀都叫人唔好退休，否則好易衰退！」跟手又話：「李嘉誠都仲做啦，我同佢差好遠，點可以唔做呀！」咦，邊方面同超人差好遠先？超人李今年都係78歲啫，唔通講身家？可惜呂主席唔肯再講多兩句。
電郵：mailto:[email protected]
