瑞銀為次按再撇千億兼籌千億新資金，加上雷曼兄弟集資計劃超購完成，市場演繹指為次按風暴已近尾聲，周二全球股市應聲而上，亦帶挈港股高開近千點。嘉賓認為熊市反彈未完，恒指可上試25000點。但楊慧玲則估計下星期會再大跌一次，所以毋須急於買貨。
黃：黃敏碩 孫：孫柏文 玲：楊慧玲
黃：恒指升逾千點，令恒指高見24195點，如果再彈，有機會升近25000水平。有持貨嘅話，個市每升1000點，就可以將啲非優質嘅蟹貨沽出，轉買優質股或者增持現金。
孫：地產分類指數由40000跌過去25000點，完全唔靚仔，係超級股災，地產股後市點睇。
黃：年頭對樓市仲抱有期望，估樓價升三成、四成同五成，地產分類指數亦跑輸恒指，𠵱家反彈到250天平均線，收復失地，但往後走勢，我就有保留。不過，擁有足夠土地儲備嘅藍籌如長實（001）、新地（016）同恒地（012），加埋綜合股九倉（004）都可以考慮。
玲：我覺得嚟緊下個禮拜港股會有啲暗湧，𠵱家唔會建議大家入市住。