港股喺第二季第一個交易日，玩謝股民。恒指高開235.73點，高高興興，但下午裂口下跌，迅速V型反彈，由低點22700.5強勁反彈，以23137.46收市。嘉賓話個市波動，買認購證要審慎。
翁世權：翁 孫柏文：孫 楊慧玲：玲
玲：今日港股似被中美夾擊，但仍企得好硬淨。下午港股勁插都呃到好多人，唔少人撲入市追咗啲認沽證，可惜後市夾番上嚟，期指最後升600點，變咗部分投資者坐咗蟹貨。
翁：好多投資者𠵱家坐咗蟹貨，個市大升大跌，夾高夾低，就連大戶近期都有少少損手，散戶對於後市走勢，亦都好難捉摸。近期入場玩番指數輪相對好少少，有call有put，兩邊都有得做。好多散戶話等個市落到底至買啦，但估底危險，萬一認為係底，買認購證係單邊嘅，但個市一落，唔止蝕，原本想短炒又要變長揸。
玲：外圍股市好奇怪，雷曼要集資、瑞銀同德銀有業績嘅壞消息出，但歐洲股市升，美期指都升逾50點（昨日下午四時半），啲人憧憬壞消息已經出盡，當好消息咁炒，會唔會見底呢﹖
翁：近期大市波動性咁大，𠵱家升跌1%，當以前升0.1%咁睇，𠵱家外圍升緊1%，我當冇郁過。
玲：金、銀、銅、油價齊跌，觸發商品股跌，好似江西銅A股喺內地跌停板，商品「錢」途點睇﹖
孫：我聽過最悲觀嘅預測話中國呢幾年大幅增加原材料，係做啲嘢出口美國，即係話，中國本身對原材料需求唔係咁大，若美國需求減，即係話原材料股可能有沽壓。
驚accu推低港交所
鄭先生：想買港交所（388），理由個價已經跌咗大半，專家話第二季個市都會好，成交相對會好番啲，有利股價，但我關注到底啲accumulator（累積認購期權合約，簡稱accu）殺晒啲貨未。
翁：我唔敢話accu將個市隊落去，accu個產品本身係睇好個市，但唔排除有大戶借孖展，孖展呢樣嘢，無論係用嚟買accu、股票抑或期指，斬起倉嚟都幾可怕。個市𠵱家變化不大，如果係買accu作怪，個市唔會咁靜。衍生工具近期好靜，如果有斬倉都應該斬完，呢個位斬嚟都嘥氣。
楊：即係話accu令港交所下跌嘅機會唔大﹖
翁：個別投資者沽售行動唔會影響大局，一定要有其他人推波助瀾，可能有啲投資者覺得個市好高，又或者有啲投資者喺舊年年尾入咗貨，個市一跌，趁有獲利空間，便沽貨獲利。
灣仔鄭先生個案
現價：134.3元 建議買入價：134.3元
目標價：170元 止蝕價：110元
時期：三個月
國壽裂口短期難補
黃小姐：幾個禮拜前買咗國壽(2628)，覺得佢有潛力，個市好，可能見30幾蚊。
翁：隻股股價喺1月初有個裂口低開，穿咗30蚊，個裂口幾大吓，要補番佢都要非常利好消息，睇番國壽窩輪資金流向，就唔係非常之強，睇好國壽而買番啲認購輪嘅投資者呢，就要細水長流啲啦。基本分析，其實舊年國壽唔少獲利都係投資收益，今年A股表現有目共睹，A股表現會唔會拖累國壽投資收益呢﹖計條數其實唔係咁嚴重，但消息出嚟就不得不小心啦。
黃小姐：喺30蚊左右都走（指買賣）過幾次。
翁：平均持貨日期幾多﹖
黃小姐：幾日。
翁：你短炒要留意啲輪場嘅資金唔多買國壽，近期熱門啲係啲指數輪同埋石油與石化類嘅股份，如果係睇好國壽，就要長啲時間至可以見到你嘅目標價。
葵涌黃小姐個案
現價：27.2元 買入價：27.5元
目標價：─ 止蝕價：─
時間：三個月