天陰陰又雨濛濛，過兩日就係清明節，中國人慎終追遠，呢兩日又到拜山時。留意墳場有無封路，叻，識揀香拜祭祖先嘅話，仲叻，唔係我亂吹水㗎，玄學顧問方海閱今日教你揀香，想做孝子賢孫？睇嘢啦。
記者：王震遠
攝影：譚盈傑、陳盛臣、林栢鈞
鳴謝：玄學顧問方海閱
拜山上香指定動作，但上香背後有乜意義呢？玄學顧問方海閱話：「上香係傳統習俗，後人慎終追遠，透過上香儀式報答同紀念祖先。同時，上香亦係種許願儀式，所謂『心假香傳』，即係假借焚香嘅煙將心意帶上上天，以物代形，所以焚香應該有頭有尾，支香燒到一半熄咗或者斷咗好唔老利㗎，有可能帶嚟凶兆。」嘩，原來咁大鑊。
市面最常見嘅係線香同盤香，質料以檀香同沉香為主，產地多數來自印度同澳洲。一分錢一分貨，香價取決於製造原料，平香主要由木渣抽煉而成，分手製同機製，機製嘅粒子密度高，易熄難點，會加入助燃劑幫助燃燒。講乜都係假，今日搵嚟市面最易買到嘅八款九吋長香，分大唔大煙、襟唔襟燒、易唔易甩色、易唔易燃點四Part做測試，又睇吓邊隻係絕世好香？
1.梁永盛招財檀香
手製檀香好易點，一擺埋火就着，香頭着得好均勻，不過好大煙，熏到我眼淚水都標，燒得好慢。（c）
大煙程度：★★★★★
點煙需時：2秒
2.萬興祥富貴蘭花香
呢支唔係檀香，係蘭花香，燒得盡，唔算好大煙，亦都唔算難點着，價錢相對較平，好多人買。（a）
大煙程度：★★★
點煙需時：3秒
3.梁永盛貢品黃檀香
檀香，手製，又係好大煙，都OK難點，唔知係唔係心理作用，硬係覺得啲煙好難散，燒得好慢。（c）
大煙程度：★★★★
點煙需時：5秒
4.寶華扎作佛公貢檀香
機器製作，真係易熄難點，一炷三支香做測試，燒燒吓其中一支熄咗，勝在一個金銀膶一大紮，超抵。（b）
大煙程度：★★★
點煙需時：6秒
5.合記香莊金裝檀香王
「金裝檀香王」，個朵改得相當堂皇，燒畀祖先一啲唔失禮。優點係易點少煙，人哋燒晒佢都仲有成截，襟燒！（a）
大煙程度：★
點煙需時：2秒
6.寶華扎作日本薰衣草香
原來薰衣草都可以製香，但用日本香拜山，感覺真係怪怪哋。一般大煙，一般易點，OK啦。（b）
大煙程度：★★★
點煙需時：3秒
7.梁永馨微烟鴻運香
叫得微煙鴻運香，果然係八款之中最少煙，不過因為加入咗黃粉，所以同時整到隻手最邋遢。（a）
大煙程度：★★
點煙需時：5秒
8.富麗堂香行發財貢檀香
機器製作，點起嚟都好少煙，無認真數過，不過肯定係八款之中最大紮，好抵買。（b）
大煙程度：★★★
點煙需時：3秒
a.合記香莊
（將軍澳彩明商場一字樓彩明街市9號舖/23465478）
b.寶華扎作
（深水埗福榮街2C舖/27769171）
c.梁永盛制香廠
（油麻地上海街334號地下/23886966）
