港交所前日推出小型恒生中國企業指數期貨（簡稱小型H股指數），為咗等啲股民可以攞多啲實戰經驗，就贊助大福證券（665）喺4月7號至5月29號，舉辦小型H股指數期貨網上模擬買賣比賽，等投資者增加投資期貨嘅認識。
H股期指嘅合約價格係50蚊一點，小型H股期指就只需要10蚊一點，而大福個比賽亦跟足，參賽者可以透過佢哋嘅網上交易平台，開一個模擬戶口，每個戶口有25萬模擬貨幣畀你投資。賺得最多嘅參賽者，可以得到一隻足金金鼠同埋價值3.5萬蚊嘅金牌。
華華問大福期貨董事盧任培攞貼士，點知佢話：「貼士累死好多人！投資係靠技術，唔係靠貼士㗎！」不過佢都透露咗點贏呢個比賽嘅貼士畀華華，佢話除咗投資技巧，仲要做好資金管理同風險管理，各位投資者收到未？